mange hai tere milne ko be-tarah se dil aaj

māñge hai tire milne ko be-tarah se dil aaj

kal kyā hai jo milnā hai mirī jaan tū mil aaj

phir sub.h se āshob-e-qayāmat hai jahāñ meñ

chehre pe tire kin ne banāyā hai ye til aaj

ai girya tū ḳhātir se mirī kiijo na sarfa

maiñ ḳhūn-e-dil-e-ḳhasta kiyā tujh pe bahil aaj

chāhe hai agar kal ko tirī nashv-o-numā ho

dil khol ke daane kī tarah ḳhaak meñ rul aaj

kyā siina jo taḌphoñ ko nigah kī tirī jhele

is tiir se rah jaa.e na faulād kī sil aaj

yā-rab na paḌe asl se apnī koī yaañ duur

ye aab thā sab jitnī ki dekhe hai tū gil aaj

'qā.em' ye ġhazab kal to na TuuTe thā tire par

dekhā hai kahīñ tiiñ vo but-e-mehr-gusil aaj

mange hai tere milne ko be-tarah se dil aaj

kal kya hai jo milna hai meri jaan tu mil aaj

phir subh se aashob-e-qayamat hai jahan mein

chehre pe tere kin ne banaya hai ye til aaj

ai girya tu KHatir se meri kijo na sarfa

main KHun-e-dil-e-KHasta kiya tujh pe bahil aaj

chahe hai agar kal ko teri nashw-o-numa ho

dil khol ke dane ki tarah KHak mein rul aaj

kya sina jo taDphon ko nigah ki teri jhele

is tir se rah jae na faulad ki sil aaj

ya-rab na paDe asl se apni koi yan dur

ye aab tha sab jitni ki dekhe hai tu gil aaj

'qaem' ye ghazab kal to na TuTe tha tere par

dekha hai kahin tin wo but-e-mehr-gusil aaj