manus ho gae hain andhe purane ghar se

mānūs ho ga.e haiñ andhe purāne ghar se

bāhar nahīñ nikalte ham raushnī ke Dar se

saa.e kī aarzū meñ lipTe hue haiñ ham sab

sunsān rāste meñ ātish-zada shajar se

ham ḳhaak ho ke bhī har mauj-e-havā se uljhe

yā'nī tirī vafā kā saudā gayā na sar se

kyā kyā na gul khileñge kyā kyā na jashn hoñge

is kisht-e-ārzū meñ bādal kabhī jo barse

tere huzūr the ham apnī nazar se ojhal

ḳhud ko bhī aaj dekhā gir kar tirī nazar se

ab tak hameñ gumāñ hai sahrā pe gulsitāñ kā

ik baar be-irāda guzrā thā vo udhar se

kyuuñ mutma.in khaḌe ho āsūdgān-e-sāhil

dariyā kā zor dekho gahrā.ī meñ utar ke

dil kā sukūñ luTā to sar kyuuñ rahā salāmat

kyuuñ zinda lauT aa.e ham 'arsh' us ke dar se

manus ho gae hain andhe purane ghar se

bahar nahin nikalte hum raushni ke Dar se

sae ki aarzu mein lipTe hue hain hum sab

sunsan raste mein aatish-zada shajar se

hum KHak ho ke bhi har mauj-e-hawa se uljhe

ya'ni teri wafa ka sauda gaya na sar se

kya kya na gul khilenge kya kya na jashn honge

is kisht-e-arzu mein baadal kabhi jo barse

tere huzur the hum apni nazar se ojhal

KHud ko bhi aaj dekha gir kar teri nazar se

ab tak hamein guman hai sahra pe gulsitan ka

ek bar be-irada guzra tha wo udhar se

kyun mutmain khaDe ho aasudgan-e-sahil

dariya ka zor dekho gahrai mein utar ke

dil ka sukun luTa to sar kyun raha salamat

kyun zinda lauT aae hum 'arsh' us ke dar se