marke kuchh zindagi ke yun bhi sar karta raha

ma.arke kuchh zindagī ke yuuñ bhī sar kartā rahā

jo muḳhālif the maiñ un ke dil meñ ghar kartā rahā

yuuñ maiñ apnī fikr-e-ahsan mo'atabar kartā rahā

dushmanoñ kī sab ḳhatā.eñ darguzar kartā rahā

gar mohabbat jurm hai to dosto taslīm hai

maiñ ḳhatā.eñ is tarah kī umr bhar kartā rahā

zindagī kī dhuup kā ehsās kyā hogā use

chāñd tāroñ kī jo chhāñv meñ safar kartā rahā

shahr ke bāhar bhī us ke naam kī ab dhuum hai

zindagī ko jo faqīrāna basar kartā rahā

jo mere apnoñ meñ thā us ne to kuchh sochā nahīñ

ġhair to phir ġhair thā zer-o-zabar kartā rahā

zindagī se jab ziyāda maut thī mere qarīb

marhale aise bhī tai maiñ be-ḳhatar kartā rahā

'shauq' ye maanā bahut dushvār thā she.rī safar

phir bhī fankāroñ pe terā fan asar kartā rahā

marke kuchh zindagi ke yun bhi sar karta raha

jo muKHalif the main un ke dil mein ghar karta raha

yun main apni fikr-e-ahsan mo'atabar karta raha

dushmanon ki sab KHataen darguzar karta raha

gar mohabbat jurm hai to dosto taslim hai

main KHataen is tarah ki umr bhar karta raha

zindagi ki dhup ka ehsas kya hoga use

chand taron ki jo chhanw mein safar karta raha

shahr ke bahar bhi us ke nam ki ab dhum hai

zindagi ko jo faqirana basar karta raha

jo mere apnon mein tha us ne to kuchh socha nahin

ghair to phir ghair tha zer-o-zabar karta raha

zindagi se jab ziyaada maut thi mere qarib

marhale aise bhi tai main be-KHatar karta raha

'shauq' ye mana bahut dushwar tha sheri safar

phir bhi fankaron pe tera fan asar karta raha