masum dil ki hasraten lafzon mein Dhaal kar

mā'sūm dil kī hasrateñ lafzoñ meñ Dhaal kar

rakhe haiñ ham ne dhuup meñ jugnū nikāl kar

hai shiddat-e-talab kā mire alamiya yahī

rakh de na merī pyaas samundar ubaal kar

chaltī nahīñ mohabbatoñ meñ jald-bāziyāñ

hote nahīñ ye faisle sikke uchhāl kar

vā'doñ ke jo khilaune thamā kar gayā thā tū

maiñ ne bhī rakh diye haiñ kahīñ par sañbhāl kar

phir yuuñ huā ki sabz ho uTThā vo regzār

nikle jab un ke haath meñ ham haath Daal kar

tujh se jirah karūñgā magar shart hai yahī

jis kā javāb tū ho mujhe vo savāl kar

ik nāznīñ kā dil huā hai gum-shuda kahīñ

aur ham khaḌe haiñ sāmne jebeñ nikāl kar

ma'sum dil ki hasraten lafzon mein Dhaal kar

rakhe hain hum ne dhup mein jugnu nikal kar

hai shiddat-e-talab ka mere alamiya yahi

rakh de na meri pyas samundar ubaal kar

chalti nahin mohabbaton mein jald-baziyan

hote nahin ye faisle sikke uchhaal kar

wa'don ke jo khilaune thama kar gaya tha tu

main ne bhi rakh diye hain kahin par sanbhaal kar

phir yun hua ki sabz ho uTTha wo regzar

nikle jab un ke hath mein hum hath Dal kar

tujh se jirah karunga magar shart hai yahi

jis ka jawab tu ho mujhe wo sawal kar

ek naznin ka dil hua hai gum-shuda kahin

aur hum khaDe hain samne jeben nikal kar