mayus ho ke jo dar-e-jaanan se aae hain

māyūs ho ke jo dar-e-jānāñ se aa.e haiñ

farzāne tang apne dil-o-jāñ se aa.e haiñ

patthar nahīñ haiñ sahn meñ ai chashm-e-nā-sipās

ye phuul haiñ jo dast-e-nigārāñ se aa.e haiñ

khā.eñ na kyoñ fareb-e-vafā jān-būjh kar

ham kyā kareñ ki aaj pashemāñ se aa.e haiñ

āḳhir thā kaun vāqif-e-ādāb-e-zindagī

ye sab lavāzimāt tirī haañ se aa.e haiñ

aa.e haiñ shaiḳh bazm-e-subū meñ zah-e-nasīb

is se ġharaz nahīñ ki gurezāñ se aa.e haiñ

'sābir' ho aisī maut se kyoñ zindagī 'azīz

ham be-qarār ho ke pareshāñ se aa.e haiñ

mayus ho ke jo dar-e-jaanan se aae hain

farzane tang apne dil-o-jaan se aae hain

patthar nahin hain sahn mein ai chashm-e-na-sipas

ye phul hain jo dast-e-nigaran se aae hain

khaen na kyon fareb-e-wafa jaan-bujh kar

hum kya karen ki aaj pasheman se aae hain

aaKHir tha kaun waqif-e-adab-e-zindagi

ye sab lawazimat teri han se aae hain

aae hain shaiKH bazm-e-subu mein zah-e-nasib

is se gharaz nahin ki gurezan se aae hain

'sabir' ho aisi maut se kyon zindagi 'aziz

hum be-qarar ho ke pareshan se aae hain