mayus ho kyon zulm ki tardid bhi hogi

māyūs ho kyoñ zulm kī tardīd bhī hogī

jab aaj moharram hai to kal eid bhī hogī

be-zauq-e-amal dahr meñ kuchh bhī nahīñ miltā

jauhar hai agar tum meñ to tā.īd bhī hogī

ḳhāmoshī-e-paiham meñ bahar-hāl sukūñ hai

tum shikva ba-lab hoge to tanqīd bhī hogī

phir bhī na sañbhal paa.e to taqdīr tumhārī

har laġhzish-e-pā par tumheñ tākīd bhī hogī

sab maslahat-e-vaqt se uktā.e hue haiñ

dīvāna koī uTThe to taqlīd bhī hogī

taḳhlīq ko miltī hai jilā ḳhūn-e-jigar se

fankār jo muḳhlis hai to tamhīd bhī hogī

va.adoñ pe ḳhudāyān-e-siyāsat ke na jaanā

va.ade hī nahīñ va.adoñ kī tajdīd bhī hogī

mazmūñ ke mutābiq na ho gar lafzoñ kī tartīb

lafzī hī nahīñ ma.anavī ta.aqīd bhī hogī

ye soch kar elān-e-vafā kījiye 'tālib'

tā.īd agar hogī to tardīd bhī hogī

mayus ho kyon zulm ki tardid bhi hogi

jab aaj moharram hai to kal eid bhi hogi

be-zauq-e-amal dahr mein kuchh bhi nahin milta

jauhar hai agar tum mein to taid bhi hogi

KHamoshi-e-paiham mein bahar-haal sukun hai

tum shikwa ba-lab hoge to tanqid bhi hogi

phir bhi na sanbhal pae to taqdir tumhaari

har laghzish-e-pa par tumhein takid bhi hogi

sab maslahat-e-waqt se uktae hue hain

diwana koi uTThe to taqlid bhi hogi

taKHliq ko milti hai jila KHun-e-jigar se

fankar jo muKHlis hai to tamhid bhi hogi

wadon pe KHudayan-e-siyasat ke na jaana

wade hi nahin wadon ki tajdid bhi hogi

mazmun ke mutabiq na ho gar lafzon ki tartib

lafzi hi nahin manawi taqid bhi hogi

ye soch kar elan-e-wafa kijiye 'talib'

taid agar hogi to tardid bhi hogi