mayus kis liye ho uTho baat karte hain

māyūs kis liye ho uTho baat karte haiñ

duniyā ke mas.aloñ pe chalo baat karte haiñ

niyyat meñ khoT garche tumhārī nahīñ hai dost

kyoñ bhāge jā rahe ho ruko baat karte haiñ

tum ko kisī bhī baat pe qaabū nahīñ rahā

pahle to apnī had meñ raho baat karte haiñ

kuchh aisā karte haiñ ki vo ḳhāmosh hī rahe

zaḳhmoñ pe zaḳhm dil ko na do baat karte haiñ

tum ne ye kaise sochā ki sar par biThā.eñge

dukh-dard apne naam karo baat karte haiñ

ai ġham zamāne baad ḳhushī milne aa.ī hai

kyoñ darmiyāñ ho apne haTo baat karte haiñ

masrūf har koī hai yahāñ jānte haiñ ham

fursat ho apne paas milo baat karte haiñ

gir kar sañbhalnā itnā kahāñ sahl hai 'nazar'

chhoḌo ravish ye TeḌhī suno baat karte haiñ

mayus kis liye ho uTho baat karte hain

duniya ke masalon pe chalo baat karte hain

niyyat mein khoT garche tumhaari nahin hai dost

kyon bhage ja rahe ho ruko baat karte hain

tum ko kisi bhi baat pe qabu nahin raha

pahle to apni had mein raho baat karte hain

kuchh aisa karte hain ki wo KHamosh hi rahe

zaKHmon pe zaKHm dil ko na do baat karte hain

tum ne ye kaise socha ki sar par biThaenge

dukh-dard apne nam karo baat karte hain

ai gham zamane baad KHushi milne aai hai

kyon darmiyan ho apne haTo baat karte hain

masruf har koi hai yahan jaante hain hum

fursat ho apne pas milo baat karte hain

gir kar sanbhalna itna kahan sahl hai 'nazar'

chhoDo rawish ye TeDhi suno baat karte hain