mayusi ki kaifiyyat jab dil par tari ho jati hai

māyūsī kī kaifiyyat jab dil par taarī ho jaatī hai

rafta rafta dīn-o-duniyā se be-zārī ho jaatī hai

avval avval ḳhush aatā hai pariyoñ ke ḳhvāboñ meñ rahnā

ba.ad meñ lekin ye hālat zehnī bīmārī ho jaatī hai

aql pe parda paḌ jaatā hai aur ham sab kuchh kho dete haiñ

jab koī shaḳhsiyyat ham ko had se pyārī ho jaatī hai

rizq muqaddar meñ likhā hai phir ye kārobār-e-jahāñ kyā

ik ik daana kamāne meñ kis darja ḳhvārī ho jaatī hai

ba.az maqām aise hote haiñ jin se aage baḌh jaa.eñ to

un tak vāpas aane meñ behad dushvārī ho jaatī hai

ham to she.rī canvas par bas dil kā haal raqam karte haiñ

sachche jazboñ se is par ḳhud naqsh-nigārī ho jaatī hai

aksar mujh se mahīnoñ 'kāshif' koī sher nahīñ ho paatā

taaza zaḳhm magar lagte hī tāza-kārī ho jaatī hai

mayusi ki kaifiyyat jab dil par tari ho jati hai

rafta rafta din-o-duniya se be-zari ho jati hai

awwal awwal KHush aata hai pariyon ke KHwabon mein rahna

baad mein lekin ye haalat zehni bimari ho jati hai

aql pe parda paD jata hai aur hum sab kuchh kho dete hain

jab koi shaKHsiyyat hum ko had se pyari ho jati hai

rizq muqaddar mein likha hai phir ye karobar-e-jahan kya

ek ek dana kamane mein kis darja KHwari ho jati hai

baz maqam aise hote hain jin se aage baDh jaen to

un tak wapas aane mein behad dushwari ho jati hai

hum to sheri canwas par bas dil ka haal raqam karte hain

sachche jazbon se is par KHud naqsh-nigari ho jati hai

aksar mujh se mahinon 'kashif' koi sher nahin ho pata

taza zaKHm magar lagte hi taza-kari ho jati hai