mazi ka tajassus hai na farda ki KHabar hai

maazī kā tajassus hai na fardā kī ḳhabar hai

ik lamha-e-maujūd hai aur apnā safar hai

qaabū meñ haiñ a.asāb na jazbāt na anfās

bikhrī huī har chiiz hai phailā huā ghar hai

har sābit-o-sayyār kī ik had hai muqarrar

aflāk kī vus.at meñ bhī dīvāreñ haiñ dar hai

kyā lamha-e-tashkīk koī zehn meñ utrā

kyā baat hai kyoñ fikr mirī zer-o-zabar hai

ā.īna-garī siikh to lī shahr meñ sab ne

kyā ā.ina-ausāf koī ā.īna-gar hai

marbūt hai tahzīb-e-kuhan se mirā rishta

lahje meñ buzurgoñ kī duāoñ kā asar hai

kuchh itnā baḌhā bojh subuk ho gayā shāna

ye ishq bhī ai 'rāz' ajab bār-e-digar hai

mazi ka tajassus hai na farda ki KHabar hai

ek lamha-e-maujud hai aur apna safar hai

qabu mein hain aasab na jazbaat na anfas

bikhri hui har chiz hai phaila hua ghar hai

har sabit-o-sayyar ki ek had hai muqarrar

aflak ki wusat mein bhi diwaren hain dar hai

kya lamha-e-tashkik koi zehn mein utra

kya baat hai kyon fikr meri zer-o-zabar hai

aaina-gari sikh to li shahr mein sab ne

kya aaina-ausaf koi aaina-gar hai

marbut hai tahzib-e-kuhan se mera rishta

lahje mein buzurgon ki duaon ka asar hai

kuchh itna baDha bojh subuk ho gaya shana

ye ishq bhi ai 'raaz' ajab bar-e-digar hai