mazi ke gulsitan mein jab le chalengi aankhen

maazī ke gulsitāñ meñ jab le chaleñgī āñkheñ

lamhoñ kī ḳhushbuoñ se mahkā kareñgī āñkheñ

yādoñ ke abr jab bhī chhā.eñge zehn-o-dil par

be-sāḳhta jhamā-jham bahne lageñgī āñkheñ

alfāz jab na hoñge hoñToñ pe hoñge taale

aise meñ dil kī saarī bāteñ kaheñgī āñkheñ

ma.alūm hai ki us ne aanā nahīñ hai vāpas

har-vaqt phir bhī us kā rasta takeñgī āñkheñ

kitne bhī hoñ samundar ashkoñ ke un meñ chāhe

duniyā ke sāmne par hañstī raheñgī āñkheñ

dīvār tākte hī guzregī raat shāyad

nīñdeñ hī ruuTh jaa.eñ to kyā kareñgī āñkheñ

ziddī haiñ is qadar ye suntī nahīñ hai kahnā

bojhal hoñ chāhe palkeñ phir bhī jageñgī āñkheñ

majbūr haiñ ye shāyad fitrat se apnī 'madhuman'

māyūsiyoñ meñ bhī kuchh sapne buneñgī āñkheñ

mazi ke gulsitan mein jab le chalengi aankhen

lamhon ki KHushbuon se mahka karengi aankhen

yaadon ke abr jab bhi chhaenge zehn-o-dil par

be-saKHta jhama-jham bahne lagengi aankhen

alfaz jab na honge honTon pe honge tale

aise mein dil ki sari baaten kahengi aankhen

malum hai ki us ne aana nahin hai wapas

har-waqt phir bhi us ka rasta takengi aankhen

kitne bhi hon samundar ashkon ke un mein chahe

duniya ke samne par hansti rahengi aankhen

diwar takte hi guzregi raat shayad

ninden hi ruTh jaen to kya karengi aankhen

ziddi hain is qadar ye sunti nahin hai kahna

bojhal hon chahe palken phir bhi jagengi aankhen

majbur hain ye shayad fitrat se apni 'madhuman'

mayusiyon mein bhi kuchh sapne bunengi aankhen