mazi ke jab zaKHm ubharne lagte hain

maazī ke jab zaḳhm ubharne lagte haiñ

āñkhoñ se jazbāt bikharne lagte haiñ

zehn-o-dil meñ us kī yādeñ aate hī

lafz sharārat ḳhud hī karne lagte haiñ

kar ke yaad tire māthe kā bosa ham

uñglī ab hoñThoñ pe dharne lagte haiñ

terī maiñ tasvīr kabhī jo dekhūñ to

mere din aur raat Thaharne lagte haiñ

bin tere sāñsoñ kī hālat mat pūchho

ghuT ghuT kar rozāna marne lagte haiñ

ham par añdhere kuchh haavī haiñ aise to

ham ḳhud ke saa.e se Darne lagte haiñ

'mīt' kahānī ulfat kī jab paḌhtā huuñ

āñkhoñ se kirdār guzarne lagte haiñ

mazi ke jab zaKHm ubharne lagte hain

aankhon se jazbaat bikharne lagte hain

zehn-o-dil mein us ki yaaden aate hi

lafz shararat KHud hi karne lagte hain

kar ke yaad tere mathe ka bosa hum

ungli ab honThon pe dharne lagte hain

teri main taswir kabhi jo dekhun to

mere din aur raat Thaharne lagte hain

bin tere sanson ki haalat mat puchho

ghuT ghuT kar rozana marne lagte hain

hum par andhere kuchh hawi hain aise to

hum KHud ke sae se Darne lagte hain

'mit' kahani ulfat ki jab paDhta hun

aankhon se kirdar guzarne lagte hain