mazi-o-haal ki taswir se hum uljhe hain

māzī-o-hāl kī tasvīr se ham uljhe haiñ

āj-kal apnī hī taqdīr se ham uljhe haiñ

mausam-e-gul kī ināyat hai ki sahrā sahrā

apne hī paañv kī zanjīr se ham uljhe haiñ

ham ne duniyā ko diyā ishq-o-mohabbat kā sabaq

kaun kahtā hai ki shamshīr se ham uljhe haiñ

zulf kī yaad kabhī us ruḳh-e-zebā kā ḳhayāl

zulmatoñ se kabhī tanvīr se ham uljhe haiñ

kārgar ho na sakā harf-o-hikāyat kā tilism

dekhiye sāhib-e-taqrīr se ham uljhe haiñ

ham se pūchho haq-o-bātil kī sadāqat aa kar

taḳhta-e-dār kī zanjīr se ham uljhe haiñ

likh diyā kātib-e-taqdīr ne jo kuchh 'hairat'

har ghaḌī bas isī tahrīr se ham uljhe haiñ

mazi-o-haal ki taswir se hum uljhe hain

aaj-kal apni hi taqdir se hum uljhe hain

mausam-e-gul ki inayat hai ki sahra sahra

apne hi panw ki zanjir se hum uljhe hain

hum ne duniya ko diya ishq-o-mohabbat ka sabaq

kaun kahta hai ki shamshir se hum uljhe hain

zulf ki yaad kabhi us ruKH-e-zeba ka KHayal

zulmaton se kabhi tanwir se hum uljhe hain

kargar ho na saka harf-o-hikayat ka tilism

dekhiye sahib-e-taqrir se hum uljhe hain

hum se puchho haq-o-baatil ki sadaqat aa kar

taKHta-e-dar ki zanjir se hum uljhe hain

likh diya katib-e-taqdir ne jo kuchh 'hairat'

har ghaDi bas isi tahrir se hum uljhe hain