machhliyan jal machhere dariya

machhliyāñ jaal machhere dariyā

ye mire ḳhvāb ye bahte dariyā

barf pighlī tirī aahaT pā kar

terī āvāz pe jaage dariyā

ye ravānī nahīñ dekhī hogī

tū ne dekhe haiñ bahut se dariyā

jis ne dekhī nahīñ āñkheñ terī

vo kabhī shaam ko dekhe dariyā

kis ko kis paar utarnā hai batā

is kahānī meñ haiñ kitne dariyā

kashtī-e-nūh meñ baiThā huuñ maiñ kyā

pīchhe tūfāñ hai aur aage dariyā

Dūbne vaale batāte hī nahīñ

kis qadar hote haiñ gahre dariyā

bastiyāñ un ko bhī aatī haiñ nazar

itne andhe nahīñ hote dariyā

tū ne pāyāb kiyā hai mujh ko

maiñ huā kartā thā pahle dariyā

tū nahīñ jāntā paanī kī kashish

tū ne dekhe nahīñ aise dariyā

machhliyan jal machhere dariya

ye mere KHwab ye bahte dariya

barf pighli teri aahaT pa kar

teri aawaz pe jage dariya

ye rawani nahin dekhi hogi

tu ne dekhe hain bahut se dariya

jis ne dekhi nahin aankhen teri

wo kabhi sham ko dekhe dariya

kis ko kis par utarna hai bata

is kahani mein hain kitne dariya

kashti-e-nuh mein baiTha hun main kya

pichhe tufan hai aur aage dariya

Dubne wale batate hi nahin

kis qadar hote hain gahre dariya

bastiyan un ko bhi aati hain nazar

itne andhe nahin hote dariya

tu ne payab kiya hai mujh ko

main hua karta tha pahle dariya

tu nahin jaanta pani ki kashish

tu ne dekhe nahin aise dariya