madar-e-zat ke girdab se nikal aaun

madār-e-zāt ke girdāb se nikal aa.uuñ

maiñ apnī zaat ke asbāb se nikal aa.uuñ

bas ek baar to paanī pe apnā aks dikhā

qasam ḳhudā kī maiñ sailāb se nikal aa.uuñ

jo mahv-e-raqs na huuñ merī ruuh ke hamrāh

maiñ aise halqa-e-ahbāb se nikal aa.uuñ

maiñ apnī jāgtī āñkhoñ se zindagī dekhūñ

mirī tamannā hai maiñ ḳhvāb se nikal aa.uuñ

tirā to lahja bahut dil-shikan hai ai jānāñ

tirī kahānī ke har baab se nikal aa.uuñ

jo tere lams kī hiddat ko jiit luuñ to maiñ

phir apnī zaat ke barfāb se nikal aa.uuñ

guñdhā huā hai mirī zaat ke ḳhamīr meñ ye

maiñ kaise ālam-e-asbāb se nikal aa.uuñ

ye raushnī mirī tahzīb kā hī hāsil hai

maiñ kaise halqa-e-ādāb se nikal aa.uuñ

jo merā pyaar hai 'rūmī' agar kabhī mil jaa.e

maiñ apnī zaat ke har ḳhvāb se nikal aa.uuñ

madar-e-zat ke girdab se nikal aaun

main apni zat ke asbab se nikal aaun

bas ek bar to pani pe apna aks dikha

qasam KHuda ki main sailab se nikal aaun

jo mahw-e-raqs na hun meri ruh ke hamrah

main aise halqa-e-ahbab se nikal aaun

main apni jagti aankhon se zindagi dekhun

meri tamanna hai main KHwab se nikal aaun

tera to lahja bahut dil-shikan hai ai jaanan

teri kahani ke har bab se nikal aaun

jo tere lams ki hiddat ko jit lun to main

phir apni zat ke barfab se nikal aaun

gundha hua hai meri zat ke KHamir mein ye

main kaise aalam-e-asbab se nikal aaun

ye raushni meri tahzib ka hi hasil hai

main kaise halqa-e-adab se nikal aaun

jo mera pyar hai 'rumi' agar kabhi mil jae

main apni zat ke har KHwab se nikal aaun