maddham ho gae apne sapne be-dam ho gain apni talashen

maddham ho ga.e apne sapne be-dam ho ga.iiñ apnī talāsheñ

vīrāñ dil meñ dafn haiñ kitnī rangīñ ummīdoñ kī lāsheñ

paiham apne ashk bahe haiñ dil ne kyā kyā jaur sahe haiñ

āfāt-e-nāgāh ke charke logoñ ke tā’noñ kī ḳharāsheñ

har jā zikr mirī nik.hat kā har jā mahrūmī kā charchā

duniyā meñ badnām huī haiñ qismat se merī parḳhāsheñ

husn kā josh na 'ishq kī garmī mahv hue saare hangāme

be-jāñ murda sard fasurda ziist ke lamhe barf kī qāsheñ

kis ne merī biptā rad kī kis ne merā haath haTāyā

ab kyoñ sab apne begāne tā'ne deñ ilzām tarāsheñ

maddham ho gae apne sapne be-dam ho gain apni talashen

viran dil mein dafn hain kitni rangin ummidon ki lashen

paiham apne ashk bahe hain dil ne kya kya jaur sahe hain

aafat-e-nagah ke charke logon ke ta’non ki KHarashen

har ja zikr meri nikhat ka har ja mahrumi ka charcha

duniya mein badnam hui hain qismat se meri parKHashen

husn ka josh na 'ishq ki garmi mahw hue sare hangame

be-jaan murda sard fasurda zist ke lamhe barf ki qashen

kis ne meri bipta rad ki kis ne mera hath haTaya

ab kyon sab apne begane ta'ne den ilzam tarashen