maddham suron ka dip sulagta hai raat mein

maddham suroñ kā diip sulagtā hai raat meñ

ḳhushbū sā ik ḳhayāl mahaktā hai raat meñ

hairat-kade ke biich meñ rahtā hai raat meñ

shāyad vo merī aañkh se taktā hai raat meñ

sochoñ meñ rakh liyā hai mujhe kis kī aañkh ne

mere liye bhī koī pighaltā hai raat meñ

utrā hai mere harf meñ phir se koī ḳhayāl

mere qalam kī aabrū rakhtā hai raat meñ

ḳhushbū sā phail jaatā hai āñchal ke aas paas

ik vāhime sā koī bikhartā hai raat meñ

pūchhā charāġh-e-shab ne tirā dil vo kyā huā

maiñ ne kahā ki kaun ye jaltā hai raat maiñ

kahne lagā ki dasht kī vahshat kahāñ ga.ī

maiñ ne kahā ki kaun saraktā hai raat meñ

būñdoñ kī rāgnī meñ koī dard hai chhupā

mausam kā iztirāb chhalaktā hai raat meñ

ilzām to na dījiye 'nīlam' kī aañkh ko

sāġhar to apne aap bahaktā hai raat meñ

maddham suron ka dip sulagta hai raat mein

KHushbu sa ek KHayal mahakta hai raat mein

hairat-kade ke bich mein rahta hai raat mein

shayad wo meri aankh se takta hai raat mein

sochon mein rakh liya hai mujhe kis ki aankh ne

mere liye bhi koi pighalta hai raat mein

utra hai mere harf mein phir se koi KHayal

mere qalam ki aabru rakhta hai raat mein

KHushbu sa phail jata hai aanchal ke aas pas

ek wahime sa koi bikharta hai raat mein

puchha charagh-e-shab ne tera dil wo kya hua

main ne kaha ki kaun ye jalta hai raat main

kahne laga ki dasht ki wahshat kahan gai

main ne kaha ki kaun sarakta hai raat mein

bundon ki ragni mein koi dard hai chhupa

mausam ka iztirab chhalakta hai raat mein

ilzam to na dijiye 'nilam' ki aankh ko

saghar to apne aap bahakta hai raat mein