mafqud kyon hain gham ke KHaridar shahr mein

mafqūd kyoñ haiñ ġham ke ḳharīdār shahr meñ

mamnū' kyoñ hai dard kā iz.hār shahr meñ

hai lafz lafz aap kā gul-bār shahr meñ

phailī huī hai nik.hat-e-guftār shahr meñ

barg-e-gulāb par jo raqam thiiñ kahāniyāñ

zahrāb mausamoñ se huiiñ ḳhaar shahr meñ

sapne nukīlī rātoñ meñ majrūh ho ga.e

zaḳhmī haiñ saarī nuur kī aqdār shahr meñ

mā'sūm ārzūoñ ke sar par thā jis kā lams

vo dast-e-ḳhush-adā huā talvār shahr meñ

shādāb jangaloñ kī javānī to kaT ga.ī

ugne lagī hai hasrat-e-ashjār shahr meñ

fahm-o-ḳhirad kī sat.h pe buqrāt haiñ sabhī

ḳhvābīda hai zamīr hī bedār shahr meñ

mā'sūm āñchaloñ se nichoḌī huī hayā

marġhūb shai hai vahshī-e-ḳhūñḳhār shahr meñ

chingāriyāñ nigāh meñ lahje meñ aañch sī

kyā paikar-e-sifāl hue naar shahr meñ

ālūdgī meñ lazzat-e-nik.hat fanā huī

ḳhushbū kā mol kuchh nahīñ sarshār shahr meñ

mafqud kyon hain gham ke KHaridar shahr mein

mamnu' kyon hai dard ka izhaar shahr mein

hai lafz lafz aap ka gul-bar shahr mein

phaili hui hai nikhat-e-guftar shahr mein

barg-e-gulab par jo raqam thin kahaniyan

zahrab mausamon se huin KHar shahr mein

sapne nukili raaton mein majruh ho gae

zaKHmi hain sari nur ki aqdar shahr mein

ma'sum aarzuon ke sar par tha jis ka lams

wo dast-e-KHush-ada hua talwar shahr mein

shadab jangalon ki jawani to kaT gai

ugne lagi hai hasrat-e-ashjar shahr mein

fahm-o-KHirad ki sath pe buqraat hain sabhi

KHwabida hai zamir hi bedar shahr mein

ma'sum aanchalon se nichoDi hui haya

marghub shai hai wahshi-e-KHunKHar shahr mein

chingariyan nigah mein lahje mein aanch si

kya paikar-e-sifal hue nar shahr mein

aaludgi mein lazzat-e-nikhat fana hui

KHushbu ka mol kuchh nahin sarshaar shahr mein