mahaz-e-zindagi ke har muhaarib se laDo sahab

mahāz-e-zindagī ke har muhārib se laḌo sāhab

kabhī aage baḌho sāhab kabhī pīchhe haTo sāhab

kabhī ḳhud bhī to samjho aql-ārā.ī kī talqīneñ

kuchh apne sāhiboñ se tarz-e-istibsār lo sāhab

kahāñ tak ham batāte jaa.eñ kab kyā kaise karnā hai

kuchh apne aap bhī achchhā burā samjhā karo sāhab

tavaqquf bhī safar kā rukn hai ab ye bhī samjhā.eñ

kahāñ ham ne kahā tum se ki bas chalte raho sāhab

pa.e-islāh-e-himmat aur basīrat donoñ lāzim haiñ

ki ḳhud qābil banū itne yā ham par chhoḌ do sāhab

zamāne ke tamāshoñ meñ ulajhnā be-vaqūfī hai

nazar bhar kar na dekho dekh kar aage baḌho sāhab

dobāra kho diyā hai tum ne ḳhud zauq-e-salīm apnā

dobāra ġhaur phir apne hī maazī par karo sāhab

hamesha imtisāl-e-amr ḳhāliq kā irāda ho

ḳhayāl-e-ittibā-e-amr-e-nafsī duur ho sāhab

arab hote to maḳhraj aur talaffuz se samajh jaate

magar urdu meñ aisā hai paḌho sāhab likho sāhab

vo jab bhī diin meñ 'tamjīd' āzādī kī bāteñ hoñ

ye lāzim hai ki lā-ikrāh ho irshād ho sāhab

mahaz-e-zindagi ke har muhaarib se laDo sahab

kabhi aage baDho sahab kabhi pichhe haTo sahab

kabhi KHud bhi to samjho aql-arai ki talqinen

kuchh apne sahibon se tarz-e-istibsar lo sahab

kahan tak hum batate jaen kab kya kaise karna hai

kuchh apne aap bhi achchha bura samjha karo sahab

tawaqquf bhi safar ka rukn hai ab ye bhi samjhaen

kahan hum ne kaha tum se ki bas chalte raho sahab

pae-islah-e-himmat aur basirat donon lazim hain

ki KHud qabil banu itne ya hum par chhoD do sahab

zamane ke tamashon mein ulajhna be-waqufi hai

nazar bhar kar na dekho dekh kar aage baDho sahab

dobara kho diya hai tum ne KHud zauq-e-salim apna

dobara ghaur phir apne hi mazi par karo sahab

hamesha imtisal-e-amr KHaliq ka irada ho

KHayal-e-ittiba-e-amr-e-nafsi dur ho sahab

arab hote to maKHraj aur talaffuz se samajh jate

magar urdu mein aisa hai paDho sahab likho sahab

wo jab bhi din mein 'tamjid' aazadi ki baaten hon

ye lazim hai ki la-ikrah ho irshad ho sahab