mahak raha hai badan sara kaisi KHushbu hai

mahak rahā hai badan saarā kaisī ḳhushbū hai

ye tere lams kī tāsīr hai ki jaadū hai

tumhārā narm-o-subuk haath chhū gayā thā kabhī

ye kaisī aag hai sozāñ har ek pahlū hai

hai kis qadar mutavāzin nigāh-o-dil kā milāp

ki jaise donoñ taraf ek saañ tarāzū hai

ravāñ-davāñ hai judā.ī kā karb ye kaisā

vo mutma.in na mujhe apne dil pe qaabū hai

zamāna kahtā hai jis ko hasīn tāj-mahal

vafā kī aañkh se Tapkā huā ik aañsū hai

bahut hasīn hai māhaul-e-zindagī 'sādiq'

nazar ke sāmne jab se vo ā.īna-rū hai

mahak raha hai badan sara kaisi KHushbu hai

ye tere lams ki tasir hai ki jadu hai

tumhaara narm-o-subuk hath chhu gaya tha kabhi

ye kaisi aag hai sozan har ek pahlu hai

hai kis qadar mutawazin nigah-o-dil ka milap

ki jaise donon taraf ek san taraazu hai

rawan-dawan hai judai ka karb ye kaisa

wo mutmain na mujhe apne dil pe qabu hai

zamana kahta hai jis ko hasin taj-mahal

wafa ki aankh se Tapka hua ek aansu hai

bahut hasin hai mahaul-e-zindagi 'sadiq'

nazar ke samne jab se wo aaina-ru hai