mahal-saraon ke diwar-o-dar se kya lena

mahal-sarāoñ ke dīvār-o-dar se kyā lenā

tire gadāoñ ko la.al-o-guhar se kyā lenā

maiñ apne zarf ko apnī nazar se dekhūñgā

kisī kī fikr kisī kī nazar se kyā lenā

jo bāl-o-par ke sahāre uḌe parinda hai

maiñ aadmī huuñ mujhe bāl-o-par se kyā lenā

maiñ ḳhud bashar huuñ bashar se hai dostī merī

mujhe tasavvur-e-fauq-ul-bashar se kyā lenā

jo chal sako to chalo mere saath manzil tak

vagarna mujh ko tumhāre safar se kyā lenā

ik aadmī ko bhī insān jo banā na sake

muaaf karnā mujhe us hunar se kyā lenā

mujhe zamīn ke zarroñ meñ nuur bharnā hai

mirī talāsh ko shams-o-qamar se kyā lenā

use to dhuup kī chaukhaT se lauT jaanā hai

nasīm-e-sub.h ko phir dopahar se kyā lenā

hai kaun bhūkā añdherā hai kis ke ghar meñ 'shafī.a'

amīr-e-shahr ko aisī ḳhabar se kyā lenā

mahal-saraon ke diwar-o-dar se kya lena

tere gadaon ko lal-o-guhar se kya lena

main apne zarf ko apni nazar se dekhunga

kisi ki fikr kisi ki nazar se kya lena

jo baal-o-par ke sahaare uDe parinda hai

main aadmi hun mujhe baal-o-par se kya lena

main KHud bashar hun bashar se hai dosti meri

mujhe tasawwur-e-fauq-ul-bashar se kya lena

jo chal sako to chalo mere sath manzil tak

wagarna mujh ko tumhaare safar se kya lena

ek aadmi ko bhi insan jo bana na sake

muaf karna mujhe us hunar se kya lena

mujhe zamin ke zarron mein nur bharna hai

meri talash ko shams-o-qamar se kya lena

use to dhup ki chaukhaT se lauT jaana hai

nasim-e-subh ko phir dopahar se kya lena

hai kaun bhuka andhera hai kis ke ghar mein 'shafia'

amir-e-shahr ko aisi KHabar se kya lena