mahbub ki baaton pe koi hoga KHafa kya

mahbūb kī bātoñ pe koī hogā ḳhafā kyā

shikva kise kahte haiñ mohabbat meñ gila kyā

dil ne mire tartīb un afsānoñ kī dī hai

kyā mast-nigāhī nigah-e-hosh-rubā kyā

ye pās-e-adab hai ki gunahgār banā huuñ

varna sar-e-mahshar mirī hotī ye sazā kyā

kyā phir ruḳh-e-raushan se naqāb us ne ulaT dī

phir tuur kā qissa kahīñ muusā se chhiḌā kyā

le jaane lage phir sū-e-but-ḳhāna har ik ko

phir qibla-e-hājāt hue qibla-numā kyā

kyā sā’iqa-e-tūr girī qalb-e-hazīñ par

vo jān-e-jahāñ aaj hai phir jalva-numā kyā

aġhyār ke chehroñ pe dhueñ uḌne lage kyoñ

qissa tirī mahfil meñ mirā aaj chhiḌā kyā

mahbub ki baaton pe koi hoga KHafa kya

shikwa kise kahte hain mohabbat mein gila kya

dil ne mere tartib un afsanon ki di hai

kya mast-nigahi nigah-e-hosh-ruba kya

ye pas-e-adab hai ki gunahgar bana hun

warna sar-e-mahshar meri hoti ye saza kya

kya phir ruKH-e-raushan se naqab us ne ulaT di

phir tur ka qissa kahin musa se chhiDa kya

le jaane lage phir su-e-but-KHana har ek ko

phir qibla-e-hajat hue qibla-numa kya

kya sa’iqa-e-tur giri qalb-e-hazin par

wo jaan-e-jahan aaj hai phir jalwa-numa kya

aghyar ke chehron pe dhuen uDne lage kyon

qissa teri mahfil mein mera aaj chhiDa kya