mahfil-e-yar mein aghyar raha karte hain

mahfil-e-yār meñ aġhyār rahā karte haiñ

ek ham haiñ ki judā.ī meñ jalā karte haiñ

mus.haf-e-ruḳh kī tilāvat meñ rahā karte haiñ

bas isī tarah se ham yād-e-ḳhudā karte haiñ

naqsh-e-pā raah meñ un kā nazar aa.e kyūñkar

ḳhūb-rū dīda-e-āshiq pe jalā karte haiñ

naza.a kā vaqt jo aaya to kahā zālim ne

dekho is tarah se ham va.ada vafā karte haiñ

fitna-e-dahr haiñ saare qad-e-bālā vaale

jis taraf jaate haiñ ik hashr bapā karte haiñ

chashm-e-maḳhmūr kī mastī se hai mastī apnī

nargisīñ jaam meñ ham phuul piyā karte haiñ

mujh se un se jo huā kartī haiñ bāteñ sar-e-bazm

sham.a kī tarah se aġhyār jalā karte haiñ

naza.a meñ us ko bulāyā to ye kahlā bhejā

chāhne vaale to har roz marā karte haiñ

daaġh de de ke mujhe rahm use aaya āḳhir

phuul kar hī shajar-e-shauq phalā karte haiñ

dil lagāne kā mazā ḳhuub uThāyā ham ne

ik nayā roz sitam un kā sahā karte haiñ

vaar koī bhī to puurā na paḌā o qātil

zaḳhm-e-dil terī nazākat pe hañsā karte haiñ

ek din un ko rulā.egī mohabbat merī

mere rone pe jo shoḳhī se hañsā karte haiñ

sham.a ro detī hai parvāne ke jalne pe magar

vo hañsā karte haiñ ushshāq jalā karte haiñ

kabhī āñkhoñ ko badal kar to kabhī tevar se

jaur par jaur jafā par vo jafā karte haiñ

in hasīnoñ kā to andāz nirālā hai 'tabīb'

in ko jo chāhe usī se ye daġhā karte haiñ

mahfil-e-yar mein aghyar raha karte hain

ek hum hain ki judai mein jala karte hain

mushaf-e-ruKH ki tilawat mein raha karte hain

bas isi tarah se hum yaad-e-KHuda karte hain

naqsh-e-pa rah mein un ka nazar aae kyunkar

KHub-ru dida-e-ashiq pe jala karte hain

naza ka waqt jo aaya to kaha zalim ne

dekho is tarah se hum wada wafa karte hain

fitna-e-dahr hain sare qad-e-baala wale

jis taraf jate hain ek hashr bapa karte hain

chashm-e-maKHmur ki masti se hai masti apni

nargisin jam mein hum phul piya karte hain

mujh se un se jo hua karti hain baaten sar-e-bazm

shama ki tarah se aghyar jala karte hain

naza mein us ko bulaya to ye kahla bheja

chahne wale to har roz mara karte hain

dagh de de ke mujhe rahm use aaya aaKHir

phul kar hi shajar-e-shauq phala karte hain

dil lagane ka maza KHub uThaya hum ne

ek naya roz sitam un ka saha karte hain

war koi bhi to pura na paDa o qatil

zaKHm-e-dil teri nazakat pe hansa karte hain

ek din un ko rulaegi mohabbat meri

mere rone pe jo shoKHi se hansa karte hain

shama ro deti hai parwane ke jalne pe magar

wo hansa karte hain ushshaq jala karte hain

kabhi aankhon ko badal kar to kabhi tewar se

jaur par jaur jafa par wo jafa karte hain

in hasinon ka to andaz nirala hai 'tabib'

in ko jo chahe usi se ye dagha karte hain