mahfil mein bar bar jo hum par nazar gai

mahfil meñ baar baar jo ham par nazar ga.ī

har dil pe jaise lahr-e-qayāmat guzar ga.ī

kar ke umīd-e-zindagī jiite rahe haiñ ham

ab ki umīd-e-zindagī jaane kidhar ga.ī

milnā tumhārā jaise bahāroñ kā imbisāt

pūchhā jo merā haal to qismat sañvar ga.ī

vo kyā ḳhabar thī jis ne hameñ be-ḳhabar kiyā

vo kyā nazar thī zaḳhm-e-jigar tak utar ga.ī

kaise hue farefta ye raaz hī rahā

shāyad nigāh-e-yār baḌā kaam kar ga.ī

uljhe haiñ is tarah se ġham-e-rozgār meñ

lazzat ġham-e-firāq kī shām-o-sahar ga.ī

ai husn tere chāhne vāloñ kī ḳhair ho

ai 'ishq terī āh-o-fuġhāñ be-asar ga.ī

har dil sulag rahā hai mohabbat kī aag meñ

jaane balā-e-‘ishq bhī kis kis ke ghar ga.ī

badnām kar ga.ī hai hameñ rasm-e-dilbarī

jo bhī nazar uThī hai vo ham par Thahar ga.ī

merī kitāb-e-ġham kā bhī qissa huā tamām

is shahr-e-nā-shanās meñ vo dar-ba-dar ga.ī

'barham' gayā hai kaam se dil bhī hamāre saath

aayā ḳhayāl-e-yār to bhī aañkh bhar ga.ī

mahfil mein bar bar jo hum par nazar gai

har dil pe jaise lahr-e-qayamat guzar gai

kar ke umid-e-zindagi jite rahe hain hum

ab ki umid-e-zindagi jaane kidhar gai

milna tumhaara jaise bahaaron ka imbisat

puchha jo mera haal to qismat sanwar gai

wo kya KHabar thi jis ne hamein be-KHabar kiya

wo kya nazar thi zaKHm-e-jigar tak utar gai

kaise hue farefta ye raaz hi raha

shayad nigah-e-yar baDa kaam kar gai

uljhe hain is tarah se gham-e-rozgar mein

lazzat gham-e-firaq ki sham-o-sahar gai

ai husn tere chahne walon ki KHair ho

ai 'ishq teri aah-o-fughan be-asar gai

har dil sulag raha hai mohabbat ki aag mein

jaane bala-e-‘ishq bhi kis kis ke ghar gai

badnam kar gai hai hamein rasm-e-dilbari

jo bhi nazar uThi hai wo hum par Thahar gai

meri kitab-e-gham ka bhi qissa hua tamam

is shahr-e-na-shanas mein wo dar-ba-dar gai

'barham' gaya hai kaam se dil bhi hamare sath

aaya KHayal-e-yar to bhi aankh bhar gai