mahfil mein hai phir zikr-e-bahaaran kai din se

mahfil meñ hai phir zikr-e-bahārāñ ka.ī din se

āñkhoñ meñ hai vo jān-e-gulistāñ ka.ī din se

kyā jāniye kyā baat huī un se kisī kī

dekhā hai unheñ ham ne pashemāñ ka.ī din se

ab dekhiye kyā aur dikhā.e ġham-e-daurāñ

kāñToñ se haiñ uljhe hue dāmāñ ka.ī din se

mā.il-ba-karam mujh pe koī ho gayā shāyad

qaabū se hai bāhar mirā īmāñ ka.ī din se

kyā bād-e-sabā de ga.ī paiġhām-e-bahārāñ

hāthoñ meñ hai ḳhud apnā garebāñ ka.ī din se

gulshan kī mire ḳhair ba-har-taur ho yā-rab

āñkhoñ meñ hai tasvīr-e-bayābāñ ka.ī din se

allāh rakhe 'fauq' unheñ apnī amaañ meñ

aate haiñ nazar ḳhvāb-e-pareshāñ ka.ī din se

mahfil mein hai phir zikr-e-bahaaran kai din se

aankhon mein hai wo jaan-e-gulistan kai din se

kya jaaniye kya baat hui un se kisi ki

dekha hai unhen hum ne pasheman kai din se

ab dekhiye kya aur dikhae gham-e-dauran

kanTon se hain uljhe hue daman kai din se

mail-ba-karam mujh pe koi ho gaya shayad

qabu se hai bahar mera iman kai din se

kya baad-e-saba de gai paigham-e-bahaaran

hathon mein hai KHud apna gareban kai din se

gulshan ki mere KHair ba-har-taur ho ya-rab

aankhon mein hai taswir-e-bayaban kai din se

allah rakhe 'fauq' unhen apni aman mein

aate hain nazar KHwab-e-pareshan kai din se