mahka hai zaKHm zaKHm hawaen hain manchali

mahkā hai zaḳhm zaḳhm havā.eñ haiñ manchalī

barsā hai terī yaad kā sāvan galī galī

dīvār-o-dar to raah meñ haa.il na ho sake

aage baḌhūñ to paañv pakaḌtī hai bekalī

ik māhtāb thā ki pighaltā chalā gayā

ik sham.a thī ki saath mire raat bhar jalī

vo raushnī jo tū ne hameñ dī thī din Dhale

vo raushnī bhī ham ne luTā dī galī galī

ye aur baat ham hī ujāloñ se duur haiñ

varna hamīñ ne terī jabīñ par shafaq malī

saa.e kā ik naqāb sā ruḳh par bikhar gayā

yaaro sahar jo us ke garebān se Dhalī

shoa.la-fishāñ hai shiddat-e-idrāk se badan

ik karb ke alaav se dīvāngī bhalī

lau de uThī haiñ biite dinoñ kī rifāqateñ

bujhte sharar bhī aag bane vo havā chalī

mahka hai zaKHm zaKHm hawaen hain manchali

barsa hai teri yaad ka sawan gali gali

diwar-o-dar to rah mein hail na ho sake

aage baDhun to panw pakaDti hai bekali

ek mahtab tha ki pighalta chala gaya

ek shama thi ki sath mere raat bhar jali

wo raushni jo tu ne hamein di thi din Dhale

wo raushni bhi hum ne luTa di gali gali

ye aur baat hum hi ujalon se dur hain

warna hamin ne teri jabin par shafaq mali

sae ka ek naqab sa ruKH par bikhar gaya

yaro sahar jo us ke gareban se Dhali

shoala-fishan hai shiddat-e-idrak se badan

ek karb ke alaw se diwangi bhali

lau de uThi hain bite dinon ki rifaqaten

bujhte sharar bhi aag bane wo hawa chali