mahkum sahi phir bhi ilaqa nahin dete

mahkūm sahī phir bhī ilāqa nahīñ dete

ham jaan to de sakte haiñ qabza nahīñ dete

apne hī bharose pe safar karnā ki ye log

manzil kā to batlāte haiñ rasta nahīñ dete

kam-zarf makīnoñ se ulajhte nahīñ saa.il

kuchh log zarūrat se ziyāda nahīñ dete

dariyā kabhī fitrat ke munāfī nahīñ chalte

sahrā kisī anjān ko saaya nahīñ dete

ham hijr ke māroñ ko bhalā kaise dilāse

bujhtī huī qindīl ko pursa nahīñ dete

har ek pe khulte nahīñ asrār-e-mohabbat

har shaḳhs ko dil jaisā ḳhazāna nahīñ dete

thūkā huā aflāk kā aa jaatā hai muñh par

shahbāz ko parvāz kā ta.ana nahīñ dete

ma.alūm hai tāsīr tire naam kī 'jāmī'

ham yūñhī to har jā pe havāla nahīñ dete

mahkum sahi phir bhi ilaqa nahin dete

hum jaan to de sakte hain qabza nahin dete

apne hi bharose pe safar karna ki ye log

manzil ka to batlate hain rasta nahin dete

kam-zarf makinon se ulajhte nahin sail

kuchh log zarurat se ziyaada nahin dete

dariya kabhi fitrat ke munafi nahin chalte

sahra kisi anjaan ko saya nahin dete

hum hijr ke maron ko bhala kaise dilase

bujhti hui qindil ko pursa nahin dete

har ek pe khulte nahin asrar-e-mohabbat

har shaKHs ko dil jaisa KHazana nahin dete

thuka hua aflak ka aa jata hai munh par

shahbaz ko parwaz ka tana nahin dete

malum hai tasir tere nam ki 'jami'

hum yunhi to har ja pe hawala nahin dete