mahrum-e-asar aah bhi hai aur dua bhi

mahrūm-e-asar aah bhī hai aur duā bhī

suntā nahīñ nākām-e-mohabbat kī ḳhudā bhī

ne.amat hai mire haq meñ mirā dard-e-mohabbat

uThtā hai jo pahlū meñ to aatā hai mazā bhī

ab Thokareñ dar dar kī na khā ai dil-e-nādāñ

miltī hai kahīñ dard-e-mohabbat kī davā bhī

tanhā tirī shoḳhī hī nahīñ dil kī talabgār

kartī hai taqāzā yahī dar-parda hayā bhī

jhuknā hī paḌā barsar-e-mahfil hameñ āḳhir

pīchhe na haTe baat se apnī vo zarā bhī

maqsūd nahīñ is se hameñ terī shikāyat

detā hai mazā josh-e-mohabbat meñ gilā bhī

kuchh faiz mohabbat se uThā.e to haiñ lekin

is jurm kī paa.ī hai bahut ham ne sazā bhī

kartā huuñ tire milne kī din raat duā.eñ

vābasta tirī yaad se hai yād-e-ḳhudā bhī

ābād rahā ḳhāna-e-dil ishq ke dam se

go husn ke hāthoñ vo ka.ī baar luTā bhī

chamkī jo sar-e-tūr tū ai barq-e-tajallī

maujūd vahāñ dekhne vaalā koī thā bhī

'sāhir' ye hai jī meñ ki piyeñ aur pilā.eñ

kartī hai taqāzā yahī sāvan kī ghaTā bhī

mahrum-e-asar aah bhi hai aur dua bhi

sunta nahin nakaam-e-mohabbat ki KHuda bhi

neamat hai mere haq mein mera dard-e-mohabbat

uThta hai jo pahlu mein to aata hai maza bhi

ab Thokaren dar dar ki na kha ai dil-e-nadan

milti hai kahin dard-e-mohabbat ki dawa bhi

tanha teri shoKHi hi nahin dil ki talabgar

karti hai taqaza yahi dar-parda haya bhi

jhukna hi paDa barsar-e-mahfil hamein aaKHir

pichhe na haTe baat se apni wo zara bhi

maqsud nahin is se hamein teri shikayat

deta hai maza josh-e-mohabbat mein gila bhi

kuchh faiz mohabbat se uThae to hain lekin

is jurm ki pai hai bahut hum ne saza bhi

karta hun tere milne ki din raat duaen

wabasta teri yaad se hai yaad-e-KHuda bhi

aabaad raha KHana-e-dil ishq ke dam se

go husn ke hathon wo kai bar luTa bhi

chamki jo sar-e-tur tu ai barq-e-tajalli

maujud wahan dekhne wala koi tha bhi

'sahir' ye hai ji mein ki piyen aur pilaen

karti hai taqaza yahi sawan ki ghaTa bhi