mahrumi-e-hayat kahin hai kahin nahin

mahrūmī-e-hayāt kahīñ hai kahīñ nahīñ

ġham kī udaas raat kahīñ hai kahīñ nahīñ

roz-e-azal se marhala-e-marg-o-zīst hai

apnī hī ek zaat kahīñ hai kahīñ nahīñ

afsurdagī-o-zinda-dilī ke hujūm meñ

ye puurī kā.enāt kahīñ hai kahīñ nahīñ

pesh-e-nazar hai vus.at-e-arz-o-samā magar

qaid-e-ta.ayyunāt kahīñ hai kahīñ nahīñ

har-chand dil vajūd-e-vafā par hai mutma.in

lekin vo ek baat kahīñ hai kahīñ nahīñ

'ahmar' hai yuuñ to sab pe kisī kī nazar magar

vo chashm-e-iltifāt kahīñ hai kahīñ nahīñ

mahrumi-e-hayat kahin hai kahin nahin

gham ki udas raat kahin hai kahin nahin

roz-e-azal se marhala-e-marg-o-zist hai

apni hi ek zat kahin hai kahin nahin

afsurdagi-o-zinda-dili ke hujum mein

ye puri kaenat kahin hai kahin nahin

pesh-e-nazar hai wusat-e-arz-o-sama magar

qaid-e-tayyunat kahin hai kahin nahin

har-chand dil wajud-e-wafa par hai mutmain

lekin wo ek baat kahin hai kahin nahin

'ahmar' hai yun to sab pe kisi ki nazar magar

wo chashm-e-iltifat kahin hai kahin nahin