mahrumiyon ka ek sabab josh-e-talab KHud bhi to hai

mahrūmiyoñ kā ik sabab josh-e-talab ḳhud bhī to hai

sho.ale pe lapkā is tarah jaise koī gul hī to hai

kis vahm kis chakkar meñ ho ḳhud-bīñ bagūloñ dam to lo

siine meñ dil ho bhī kahīñ maanā ki betābī to hai

sūjhe magar kyā sham.a ko apne ujāle ke sivā

har chand zauq-e-dīd kā maidān tārīkī to hai

jhāñkā hai maiñ ne saaz meñ parda haTā kar saaz kā

naġhma nazar aa jā.egā ye aas bejā bhī to hai

har baaġh meñ uḌtā phirūñ har shāḳh par girtā rahūñ

har gul se ḳhushbū chuus luuñ ab ye merī zid hī to hai

hai hai vo shīrīñ jhalkiyāñ kab tak magar sar phoḌiye

dīvār phir dīvār hai hālāñki shīshe kī to hai

phir bhī ye dhun hai mauj se dariyā ko apne naap luuñ

paimāna merā hai ġhalat mujh ko ḳhabar itnī to hai

piitā rahā kyā umr bhar pī kar tamannā kā lahū

kuchh din se merī āstīñ kuchh zer-e-lab kahtī to hai

hotī kahāñ tak mustarad be-bākī-e-dast-e-sabā

khulne lagā band-e-hayā āḳhir shagūfa hī to hai

ta.amīr āḳhir kar liyā hasrat ne ḳhvāboñ kā haram

shaġhl-e-gunah ke vāste ye aaḌ bhī kaafī to hai

mashq-e-ḳhud-āshāmī karūñ sairāb honā siikh luuñ

labrez ḳhud hai tishnagī sāġhar mirā ḳhālī to hai

ab sulh kar bhī leñ 'muhib' tanhā.iyoñ se vahshateñ

vo merā saaya hī sahī ik shai nazar aa.ī to hai

mahrumiyon ka ek sabab josh-e-talab KHud bhi to hai

shoale pe lapka is tarah jaise koi gul hi to hai

kis wahm kis chakkar mein ho KHud-bin bagulon dam to lo

sine mein dil ho bhi kahin mana ki betabi to hai

sujhe magar kya shama ko apne ujale ke siwa

har chand zauq-e-did ka maidan tariki to hai

jhanka hai main ne saz mein parda haTa kar saz ka

naghma nazar aa jaega ye aas beja bhi to hai

har bagh mein uDta phirun har shaKH par girta rahun

har gul se KHushbu chus lun ab ye meri zid hi to hai

hai hai wo shirin jhalkiyan kab tak magar sar phoDiye

diwar phir diwar hai haalanki shishe ki to hai

phir bhi ye dhun hai mauj se dariya ko apne nap lun

paimana mera hai ghalat mujh ko KHabar itni to hai

pita raha kya umr bhar pi kar tamanna ka lahu

kuchh din se meri aastin kuchh zer-e-lab kahti to hai

hoti kahan tak mustarad be-baki-e-dast-e-saba

khulne laga band-e-haya aaKHir shagufa hi to hai

tamir aaKHir kar liya hasrat ne KHwabon ka haram

shaghl-e-gunah ke waste ye aaD bhi kafi to hai

mashq-e-KHud-ashami karun sairab hona sikh lun

labrez KHud hai tishnagi saghar mera KHali to hai

ab sulh kar bhi len 'muhib' tanhaiyon se wahshaten

wo mera saya hi sahi ek shai nazar aai to hai