mahrumiyon ka KHauf nahin hai zara mujhe

mahrūmiyoñ kā ḳhauf nahīñ hai zarā mujhe

pahchāntī hai shahr kī āb-o-havā mujhe

ik umr is safar meñ guzarne ke bāvajūd

kyoñ ajnabī sā lagtā hai har rāsta mujhe

bejā anā tabāhī kā kirdār ban ga.ī

ḳhud-sāḳhta ġhurūr ne rusvā kiyā mujhe

kotāhiyoñ kā daḳhl hai merī shikast meñ

nākāmiyoñ ne raaz ye samjhā diyā mujhe

har chand sāmne thī mire manzil-e-yaqīñ

lekin ġhalat qayās ne bhaTkā diyā mujhe

ab saarā shahr merā ḳharīdār ban gayā

itnā mire ḳhulūs ne sastā kiyā mujhe

likh dī amīr-e-shahr ne dastūr meñ ye baat

mujrim ho koī aur milegī sazā mujhe

hone lage the mujh se gurezāñ tamām log

ghabrā ke toḌnā hī paḌā aa.ina mujhe

yuuñ to 'sirāj' us kī mohabbat meñ hai fareb

lekin usī nigāh ne achchhā kiyā mujhe

mahrumiyon ka KHauf nahin hai zara mujhe

pahchanti hai shahr ki aab-o-hawa mujhe

ek umr is safar mein guzarne ke bawajud

kyon ajnabi sa lagta hai har rasta mujhe

beja ana tabahi ka kirdar ban gai

KHud-saKHta ghurur ne ruswa kiya mujhe

kotahiyon ka daKHl hai meri shikast mein

nakaamiyon ne raaz ye samjha diya mujhe

har chand samne thi mere manzil-e-yaqin

lekin ghalat qayas ne bhaTka diya mujhe

ab sara shahr mera KHaridar ban gaya

itna mere KHulus ne sasta kiya mujhe

likh di amir-e-shahr ne dastur mein ye baat

mujrim ho koi aur milegi saza mujhe

hone lage the mujh se gurezan tamam log

ghabra ke toDna hi paDa aaina mujhe

yun to 'siraj' us ki mohabbat mein hai fareb

lekin usi nigah ne achchha kiya mujhe