mahrumiyon ka mujhko jo aadi bana diya

mahrūmiyoñ kā mujh ko jo aadī banā diyā

maiñ pūchhtā huuñ tujh se diyā bhī to kyā diyā

haañ ai hujūm-e-ashk ye achchhā nahīñ huā

tū ne hamāre zabt kā rutba ghaTā diyā

kaise amaañ milegī hameñ tez dhuup se

sūraj ne har daraḳht kā saaya jalā diyā

ik ajnabī kī baat meñ jaadū kā thā asar

patthar diloñ meñ dard-e-mohabbat jagā diyā

jab apne saath saath thā ḳhush-hāl thā bahut

ḳhud se bichhaḌ ke ḳhud ko gadāgar banā diyā

kal raat tere va.ade kā bhī khul gayā bharam

zaḳhmoñ ko hañste dekh ke maiñ muskurā diyā

rañgīnī-e-bahār ke ham muntazir haiñ kyuuñ

bād-e-ḳhizāñ ne rañg-e-gulistāñ uḌā diyā

dil kā charāġh ḳhud hī jalāyā kabhī 'sadaf'

aur ḳhud hī us charāġh ko āḳhir bujhā diyā

mahrumiyon ka mujh ko jo aadi bana diya

main puchhta hun tujh se diya bhi to kya diya

han ai hujum-e-ashk ye achchha nahin hua

tu ne hamare zabt ka rutba ghaTa diya

kaise aman milegi hamein tez dhup se

suraj ne har daraKHt ka saya jala diya

ek ajnabi ki baat mein jadu ka tha asar

patthar dilon mein dard-e-mohabbat jaga diya

jab apne sath sath tha KHush-haal tha bahut

KHud se bichhaD ke KHud ko gadagar bana diya

kal raat tere wade ka bhi khul gaya bharam

zaKHmon ko hanste dekh ke main muskura diya

rangini-e-bahaar ke hum muntazir hain kyun

baad-e-KHizan ne rang-e-gulistan uDa diya

dil ka charagh KHud hi jalaya kabhi 'sadaf'

aur KHud hi us charagh ko aaKHir bujha diya