mahshar-e-ummid pahle dil mein paida kijiye

mahshar-e-ummīd pahle dil meñ paidā kījiye

us kā jalva dekhne kī phir tamanna kījiye

ik nayā 'ālam ba-qadr-e-shauq paidā kījiye

har nazar ko husn kī mahv-e-tamāshā kījiye

baḌhte baḌhte ho ga.ī vahshat muhīt-e-kā.enāt

lutf to jab hai ki har zarre ko sahrā kījiye

chāhtā hai vus'ateñ un kā fareb-e-iltifāt

dil ke har goshe meñ paidā ek duniyā kījiye

yuuñ niyāz-e-'ishq meñ ho jaa.e takmīl-e-vafā

āstān-e-nāz ke zarroñ ko sajda kījiye

jalva-e-gul meñ dikhāte haiñ tajallī husn kī

dekhne vāloñ se kahte haiñ ki dekhā kījiye

jhuum kar maiḳhāne pe chhā.ī ghaTā hai ai 'zabīh'

toḌ kar ab tauba shaġhl-e-jām-o-mīnā kījiye

mahshar-e-ummid pahle dil mein paida kijiye

us ka jalwa dekhne ki phir tamanna kijiye

ek naya 'alam ba-qadr-e-shauq paida kijiye

har nazar ko husn ki mahw-e-tamasha kijiye

baDhte baDhte ho gai wahshat muhit-e-kaenat

lutf to jab hai ki har zarre ko sahra kijiye

chahta hai wus'aten un ka fareb-e-iltifat

dil ke har goshe mein paida ek duniya kijiye

yun niyaz-e-'ishq mein ho jae takmil-e-wafa

aastan-e-naz ke zarron ko sajda kijiye

jalwa-e-gul mein dikhate hain tajalli husn ki

dekhne walon se kahte hain ki dekha kijiye

jhum kar maiKHane pe chhai ghaTa hai ai 'zabih'

toD kar ab tauba shaghl-e-jam-o-mina kijiye