mahshar ka etibar hua hai kabhi kabhi

mahshar kā e'tibār huā hai kabhī kabhī

be-parda husn-e-yār huā hai kabhī kabhī

raqsāñ jamāl-e-yār huā hai kabhī kabhī

parda meñ intishār huā hai kabhī kabhī

pahuñchī hai ḳhāk-e-āshiq-e-barbād arsh par

ūñchā agar ġhubār huā hai kabhī kabhī

zāhid tavāf karte haiñ us āstāñ kā ham

ka.abe meñ jo shumār huā hai kabhī kabhī

paimāñ-shikan ke va.ade ke hamrāh ai ajal

terā bhī intizār huā hai kabhī kabhī

ik sajda vo bhī be-ḳhudī-e-iztirāb meñ

us āstāñ pe baar huā hai kabhī kabhī

dāmān-e-tañg-o-josh-e-bahārāñ ko dekh kar

andāza-e-bahār huā hai kabhī kabhī

vo ḳhud hī raaz ban gayā duniyā ke vāste

jo us kā rāzdār huā hai kabhī kabhī

jaise vo aa.e baiThe bhī uTh kar chale ga.e

is darja e'tibār huā hai kabhī kabhī

vahdat parastiyoñ se bhī 'afqar' ḳhudā gavāh

barham mizāj-e-yār huā hai kabhī kabhī

mahshar ka e'tibar hua hai kabhi kabhi

be-parda husn-e-yar hua hai kabhi kabhi

raqsan jamal-e-yar hua hai kabhi kabhi

parda mein intishaar hua hai kabhi kabhi

pahunchi hai KHak-e-ashiq-e-barbaad arsh par

uncha agar ghubar hua hai kabhi kabhi

zahid tawaf karte hain us aastan ka hum

kabe mein jo shumar hua hai kabhi kabhi

paiman-shikan ke wade ke hamrah ai ajal

tera bhi intizar hua hai kabhi kabhi

ek sajda wo bhi be-KHudi-e-iztirab mein

us aastan pe bar hua hai kabhi kabhi

daman-e-tang-o-josh-e-bahaaran ko dekh kar

andaza-e-bahaar hua hai kabhi kabhi

wo KHud hi raaz ban gaya duniya ke waste

jo us ka raazdar hua hai kabhi kabhi

jaise wo aae baiThe bhi uTh kar chale gae

is darja e'tibar hua hai kabhi kabhi

wahdat parastiyon se bhi 'afqar' KHuda gawah

barham mizaj-e-yar hua hai kabhi kabhi