mahshar mein haal dil ka KHuda ko sunaenge

mahshar meñ haal dil kā ḳhudā ko sunā.eñge

chup-chāp us ke baa'd jahannum meñ jā.eñge

sajde kī jab kahīñ bhī tamanna huī hameñ

har baar terā naqsh-e-kaf-e-pā banā.eñge

sochā na thā ki pahlū se lag kar raqīb ke

is naaz aur adā se vo mahfil meñ ā.eñge

mehñdī ko pīsne kī vo zahmat kareñge kyoñ

hāthoñ pe mere ḳhuun kī mehñdī rachāeñge

ik roz ghar se nikleñge merī talāsh meñ

afsos par vo merā nishāñ tak na pā.eñge

ghūmegī ye zamīn bhī ulTī isī ke saath

kuuze ko rakh ke chaak pe aisā ghumā.eñge

mastī meñ jo ye nāchte phirte haiñ āj-kal

kal ko ye apne gird zamāna nachā.eñge

jis roz mil gayā hameñ us kā koī nishāñ

pahle to terā naqsh-e-kaf-e-pā miTā.eñge

marne ko ek shart pe tayyār huuñ ki aap

mahshar meñ mujh ko apnā hī kah kar uThā.eñge

tab tak na chain pā.eñge rind-e-ḳharāb-hāl

jab tak na jaam sāqī-e-kausar pilā.eñge

ābād bastiyoñ se hameñ kyā ġharaz ki ham

'āshiq haiñ jā ke dasht meñ ḳhema lagā.eñge

farhād tujh se log zamāne meñ ab kahāñ

ab kaun haiñ jo duudh kī nahreñ bahā.enge

'haidar' jo dushmanān-e-suḳhan haiñ vo dekhiyo

aa kar mire mazār pe ġhazleñ sunā.eñge

mahshar mein haal dil ka KHuda ko sunaenge

chup-chap us ke ba'd jahannum mein jaenge

sajde ki jab kahin bhi tamanna hui hamein

har bar tera naqsh-e-kaf-e-pa banaenge

socha na tha ki pahlu se lag kar raqib ke

is naz aur ada se wo mahfil mein aaenge

mehndi ko pisne ki wo zahmat karenge kyon

hathon pe mere KHun ki mehndi rachaenge

ek roz ghar se niklenge meri talash mein

afsos par wo mera nishan tak na paenge

ghumegi ye zamin bhi ulTi isi ke sath

kuze ko rakh ke chaak pe aisa ghumaenge

masti mein jo ye nachte phirte hain aaj-kal

kal ko ye apne gird zamana nachaenge

jis roz mil gaya hamein us ka koi nishan

pahle to tera naqsh-e-kaf-e-pa miTaenge

marne ko ek shart pe tayyar hun ki aap

mahshar mein mujh ko apna hi kah kar uThaenge

tab tak na chain paenge rind-e-KHarab-haal

jab tak na jam saqi-e-kausar pilaenge

aabaad bastiyon se hamein kya gharaz ki hum

'ashiq hain ja ke dasht mein KHema lagaenge

farhad tujh se log zamane mein ab kahan

ab kaun hain jo dudh ki nahren bahaenge

'haidar' jo dushmanan-e-suKHan hain wo dekhiyo

aa kar mere mazar pe ghazlen sunaenge