mahsus hoti hi nahin teri kami mujhe

mahsūs hotī hī nahīñ terī kamī mujhe

le aa.ī kis maqām pe ye zindagī mujhe

niiñd aane kā koī nahīñ imkāñ so raat bhar

maiñ dekhtā rahūñgā ghaḌī ko ghaḌī mujhe

apnā ḳhayāl rakkheñge so.eñge vaqt par

jo baat maiñ ne kahnī thī us ne kahī mujhe

baaqī vo puurā puurā khulā mujh pe ḳhud-baḳhud

band-e-qabā kī girheñ thiiñ bas kholnī mujhe

achchhe nasīb vaalā thā tū yaar is liye

ye raushnī milī hai tujhe tīrgī mujhe

haiñ sau tarīqe ġham se rihā.ī ke mere paas

fankār huuñ pasand nahīñ ḳhud-kushī mujhe

aisī jagah the donoñ meñ se ik ne marnā thā

'kaunain' us ko pyārā thā maiñ zindagī mujhe

mahsus hoti hi nahin teri kami mujhe

le aai kis maqam pe ye zindagi mujhe

nind aane ka koi nahin imkan so raat bhar

main dekhta rahunga ghaDi ko ghaDi mujhe

apna KHayal rakkhenge soenge waqt par

jo baat main ne kahni thi us ne kahi mujhe

baqi wo pura pura khula mujh pe KHud-baKHud

band-e-qaba ki girhen thin bas kholni mujhe

achchhe nasib wala tha tu yar is liye

ye raushni mili hai tujhe tirgi mujhe

hain sau tariqe gham se rihai ke mere pas

fankar hun pasand nahin KHud-kushi mujhe

aisi jagah the donon mein se ek ne marna tha

'kaunain' us ko pyara tha main zindagi mujhe