mahz ye wahm hai ya hai mera apna saya

mahz ye vahm hai yā hai mirā apnā saaya

kaun ye chāñd kī nagrī se utar kar aaya

ajnabiyyat ke bhī ādāb huā karte haiñ

ajnabī thā to mujhe dekh ke kyoñ ghabrāyā

maiñ musāfir thā mirā haq thā har ik raste par

ye alag baat ki rastoñ ne mujhe bhaTkāyā

jab añdherā thā to ham donoñ meñ tafrīq na thī

chāñd ubhrā to judā ho gayā merā saaya

ye jo do patte haiñ kab in meñ se ik gir jaa.e

maiñ ne is daur meñ har ek ko tanhā paayā

vaqt ik āhanī dīvār bhī ban saktā hai

kitne lamhoñ ko TaTolā to ye nukta paayā

duur se kitne chamakte hue motī dekhe

jis ko nazdīk se dekhā use patthar paayā

ruuh kā raag to har shaḳhs ne chheḌā 'farhān'

jism meñ kyā thā ki har ik ne use Thukrāyā

mahz ye wahm hai ya hai mera apna saya

kaun ye chand ki nagri se utar kar aaya

ajnabiyyat ke bhi aadab hua karte hain

ajnabi tha to mujhe dekh ke kyon ghabraya

main musafir tha mera haq tha har ek raste par

ye alag baat ki raston ne mujhe bhaTkaya

jab andhera tha to hum donon mein tafriq na thi

chand ubhra to juda ho gaya mera saya

ye jo do patte hain kab in mein se ek gir jae

main ne is daur mein har ek ko tanha paya

waqt ek aahani diwar bhi ban sakta hai

kitne lamhon ko TaTola to ye nukta paya

dur se kitne chamakte hue moti dekhe

jis ko nazdik se dekha use patthar paya

ruh ka rag to har shaKHs ne chheDa 'farhan'

jism mein kya tha ki har ek ne use Thukraya