mai-e-faraghat ka aaKHiri daur chal raha tha

mai-e-farāġhat kā āḳhirī daur chal rahā thā

subū kināre visāl kā chāñd Dhal rahā thā

vo saaz kī lai ki nāchtā thā lahū ragoñ meñ

vo hiddat-e-mai ki lamha lamha pighal rahā thā

fazā meñ lahrā rahe the afsurdagī ke saa.e

ajab ghaḌī thī ki vaqt bhī haath mal rahā thā

sakūñ se mahrūm thiiñ tarab-gāh kī nashisteñ

ki ik nayā iztirāb jismoñ meñ chal rahā thā

nigāheñ dāvat kī mez se duur kho ga.ī thiiñ

tamām zehnoñ meñ ek saaya sā chal rahā thā

havā-e-ġhurbat kī lahr anfās meñ ravāñ thī

na.e safar kā charāġh sīnoñ meñ jal rahā thā

bhaḌak rahī thī diloñ meñ hasrat kī pyaas lekin

vahīñ na.ī aarzū kā chashma ubal rahā thā

badan pe taarī thā ḳhauf gahre samundaroñ kā

ragoñ meñ shauq-e-shanāvarī bhī machal rahā thā

na jaane kaisā thā inqalāb-e-sahar kā aalam

badal rahī thī nazar ki manzar badal rahā thā

mai-e-faraghat ka aaKHiri daur chal raha tha

subu kinare visal ka chand Dhal raha tha

wo saz ki lai ki nachta tha lahu ragon mein

wo hiddat-e-mai ki lamha lamha pighal raha tha

faza mein lahra rahe the afsurdagi ke sae

ajab ghaDi thi ki waqt bhi hath mal raha tha

sakun se mahrum thin tarab-gah ki nashisten

ki ek naya iztirab jismon mein chal raha tha

nigahen dawat ki mez se dur kho gai thin

tamam zehnon mein ek saya sa chal raha tha

hawa-e-ghurbat ki lahr anfas mein rawan thi

nae safar ka charagh sinon mein jal raha tha

bhaDak rahi thi dilon mein hasrat ki pyas lekin

wahin nai aarzu ka chashma ubal raha tha

badan pe tari tha KHauf gahre samundaron ka

ragon mein shauq-e-shanawari bhi machal raha tha

na jaane kaisa tha inqalab-e-sahar ka aalam

badal rahi thi nazar ki manzar badal raha tha