mai-e-gul-rang ki hai jalwa-gari shishe mein

mai-e-gul-rang kī hai jalva-garī shīshe meñ

band kī hai mire saaqī ne parī shīshe meñ

charḳh par rang-e-shafaq dekh ke vajd aatā hai

kyā sharāb-e-shafaqī hai ye bharī shīshe meñ

mai-kasho aish uThā lo ki bahār āḳhir hai

jalva-e-mai hai charāġh-e-saharī shīshe meñ

zindagī kā chaman is mai se tar-o-tāza hai

sāqiyā hai ye hayāt-e-basharī shīshe meñ

duḳht-e-raz parde ke andar bhī sitam Dhātī hai

kaam kar jaatī hai jādū-nazarī shīshe meñ

shīsha-o-jām meñ kyā hai ye na pūchho 'usmān'

be-ḳhudī jaam meñ hai be-ḳhabarī shīshe meñ

mai-e-gul-rang ki hai jalwa-gari shishe mein

band ki hai mere saqi ne pari shishe mein

charKH par rang-e-shafaq dekh ke wajd aata hai

kya sharab-e-shafaqi hai ye bhari shishe mein

mai-kasho aish uTha lo ki bahaar aaKHir hai

jalwa-e-mai hai charagh-e-sahari shishe mein

zindagi ka chaman is mai se tar-o-taza hai

saqiya hai ye hayat-e-bashari shishe mein

duKHt-e-raz parde ke andar bhi sitam Dhati hai

kaam kar jati hai jadu-nazari shishe mein

shisha-o-jam mein kya hai ye na puchho 'usman'

be-KHudi jam mein hai be-KHabari shishe mein