mai-kashi chhoD di tauhin-e-hunar kar aaya

mai-kashī chhoḌ dī tauhīn-e-hunar kar aayā

jaam ulTā.e subū zer-o-zabar kar aayā

jab vo dīvār girī thī to ye dar kyuuñ rahtā

bas yahī soch ke mismār vo ghar kar aayā

dasht-e-imkān meñ tanhā maiñ kahāñ tak jaatā

jab gumāñ bhī na rahā tark safar kar aayā

ek ummīd kā aalam hai ki thaktā hī nahīñ

bār-e-ehsān se bhī sarf-e-nazar kar aayā

raah dushvār thī aur is ke taġhāful kā yaqīñ

shukr-e-altāf ki ye ma.arka sar kar aayā

vahshat-e-zīst mubārak tirī sābit-qadamī

daaġh bhartā rahā qatre ko guhar kar aayā

nāvak-e-nāz tirī ḳhair ki ishq-e-ḳhush-nūd

ḳhud-numā.ī ke liye ḳhūn-e-jigar kar aayā

mujh se behtar to mirā ḳhvāb thā jhūTā hī sahī

tire pahlū meñ jo ik raat basar kar aayā

ham samajhte the jise hamdam-o-hamrāz apnā

vo hī 'salmān' harīfoñ ko ḳhabar kar aayā

mai-kashi chhoD di tauhin-e-hunar kar aaya

jam ulTae subu zer-o-zabar kar aaya

jab wo diwar giri thi to ye dar kyun rahta

bas yahi soch ke mismar wo ghar kar aaya

dasht-e-imkan mein tanha main kahan tak jata

jab guman bhi na raha tark safar kar aaya

ek ummid ka aalam hai ki thakta hi nahin

bar-e-ehsan se bhi sarf-e-nazar kar aaya

rah dushwar thi aur is ke taghaful ka yaqin

shukr-e-altaf ki ye marka sar kar aaya

wahshat-e-zist mubarak teri sabit-qadami

dagh bharta raha qatre ko guhar kar aaya

nawak-e-naz teri KHair ki ishq-e-KHush-nud

KHud-numai ke liye KHun-e-jigar kar aaya

mujh se behtar to mera KHwab tha jhuTa hi sahi

tere pahlu mein jo ek raat basar kar aaya

hum samajhte the jise hamdam-o-hamraaz apna

wo hi 'salman' harifon ko KHabar kar aaya