main aag hun pani hun na miTTi na hawa hun

maiñ aag huuñ paanī huuñ na miTTī na havā huuñ

hālāñki inhīñ chaar 'anāsir se banā huuñ

rishtoñ kī haqīqat ke bharam Tuut rahe haiñ

ik shāḳh-e-burīda kī taraf dekh rahā huuñ

majbūr huuñ maiñ apne usūloñ kī binā par

duniyā ye samajhtī hai ki pāband-e-anā huuñ

mahfūz mujhe kar leñ zamāne kī nigāheñ

maiñ apne tashaḳhḳhus meñ akelā hī bachā huuñ

vo shaan hai merī ki malā.ik kā huuñ masjūd

kahne ko khanaktī huī miTTī se banā huuñ

ghar meñ to mirī ek nahīñ chaltī hai lekin

bāhar yahī mash.hūr hai maiñ ghar kā baḌā huuñ

maiñ 'nūr' ta'āruf ke liye kuchh nahīñ rakhtā

ab kaise batā.ūñgā tumheñ kaun huuñ kyā huuñ

main aag hun pani hun na miTTi na hawa hun

haalanki inhin chaar 'anasir se bana hun

rishton ki haqiqat ke bharam Tut rahe hain

ek shaKH-e-burida ki taraf dekh raha hun

majbur hun main apne usulon ki bina par

duniya ye samajhti hai ki paband-e-ana hun

mahfuz mujhe kar len zamane ki nigahen

main apne tashaKHKHus mein akela hi bacha hun

wo shan hai meri ki malaik ka hun masjud

kahne ko khanakti hui miTTi se bana hun

ghar mein to meri ek nahin chalti hai lekin

bahar yahi mashhur hai main ghar ka baDa hun

main 'nur' ta'aruf ke liye kuchh nahin rakhta

ab kaise bataunga tumhein kaun hun kya hun