main aankhon mein sabhi ke chubh raha hun

maiñ āñkhoñ meñ sabhī ke chubh rahā huuñ

ki jab se aa.ina banñe lagā huuñ

bujhā deñge havā.eñ jāntā huuñ

maiñ sūraj to nahīñ huuñ ik diyā huuñ

lagā mujh ko ki jannat mil ga.ī hai

gale lag kar maiñ jab maañ se milā huuñ

na jaane log kaise haiñ yahāñ ke

maiñ is shahr-e-ġharībāñ meñ nayā huuñ

mire din bhī phireñge ġham na khaao

maiñ ab ḳhud se kamāne lag gayā huuñ

kahāñ mumkin dubārā uTh sakūñgā

ki muñh ke bal maiñ kuchh aise girā huuñ

milī hai kāmyābī mushkiloñ se

maiñ 'sārim' ḳhaak meñ pahle milā huuñ

main aankhon mein sabhi ke chubh raha hun

ki jab se aaina banne laga hun

bujha denge hawaen jaanta hun

main suraj to nahin hun ek diya hun

laga mujh ko ki jannat mil gai hai

gale lag kar main jab man se mila hun

na jaane log kaise hain yahan ke

main is shahr-e-ghariban mein naya hun

mere din bhi phirenge gham na khao

main ab KHud se kamane lag gaya hun

kahan mumkin dubara uTh sakunga

ki munh ke bal main kuchh aise gira hun

mili hai kaamyabi mushkilon se

main 'sarim' KHak mein pahle mila hun