main aansuon ko ishq mein kab tak lahu karun

maiñ āñsuoñ ko 'ishq meñ kab tak lahū karūñ

mauqa' mile to dāman-e-dil ko rafū karūñ

kyā baat hai ki aa.eñ ta'alluq meñ talḳhiyāñ

maiñ sochtā huuñ tum se kabhī guftugū karūñ

jab ho ga.ī hai ḳhidmat-e-shāḳh-o-shajar nasīb

paidā chaman meñ kuchh to na.ī rang-o-bū karūñ

sach aur jhuuT donoñ to ik hī tarah ke haiñ

maiñ kyoñ na ek roz inheñ rū-ba-rū karūñ

mehmāñ to ho vo māh-jabīñ merā koī shaam

maiñ ehtimām-e-bāda-o-jām-o-subū karūñ

tahzīb se hamārī jo baaqī rahe sadā

gangā meñ tum nahāo to maiñ bhī vuzū karūñ

parvardigār ye bhī du'ā kar mirī qubūl

puurī na ho jo aisī koī aarzū karūñ

'gauhar' mile zarā bhī agar bārishoñ kā saath

paidā mizāj-e-ḳhāk meñ zauq-e-numū karūñ

main aansuon ko 'ishq mein kab tak lahu karun

mauqa' mile to daman-e-dil ko rafu karun

kya baat hai ki aaen ta'alluq mein talKHiyan

main sochta hun tum se kabhi guftugu karun

jab ho gai hai KHidmat-e-shaKH-o-shajar nasib

paida chaman mein kuchh to nai rang-o-bu karun

sach aur jhuT donon to ek hi tarah ke hain

main kyon na ek roz inhen ru-ba-ru karun

mehman to ho wo mah-jabin mera koi sham

main ehtimam-e-baada-o-jam-o-subu karun

tahzib se hamari jo baqi rahe sada

ganga mein tum nahao to main bhi wuzu karun

parwardigar ye bhi du'a kar meri qubul

puri na ho jo aisi koi aarzu karun

'gauhar' mile zara bhi agar barishon ka sath

paida mizaj-e-KHak mein zauq-e-numu karun