main aasman ko dekhta hun aasman mujhe

maiñ āsmāñ ko dekhtā huuñ āsmāñ mujhe

achchhā huā ki bhuul ga.e mehrbāñ mujhe

mānūs ho gayā huuñ kuchh aisā qafas se maiñ

aatā nahīñ hai yaad abhī āshiyāñ mujhe

tāqat nahīñ ki zabt karūñ rāz-e-ġham magar

ḳhāmosh kar rahī hai ye merī zabāñ mujhe

haañ phir tū jalva-bār ho ai barq-e-tūr-soz

haañ haañ abhī hai hausla-e-imtihāñ mujhe

mar kar bhī kashmakash hai vahī husn-o-ishq kī

denā paḌe na hashr meñ bhī imtihāñ mujhe

mere liye muraqqa-e-ibrat hai kā.enāt

ik dars de rahī hai bahār-e-ḳhizāñ mujhe

jab tāqatoñ ne merī mujhe de diyā javāb

phir kyā pukārtā jaras-e-kārvāñ mujhe

'sāqib' kisī se apnī tabāhī kā kyā gila

ḳhud sa.ī-e-justujū ne kiyā be-nishāñ mujhe

main aasman ko dekhta hun aasman mujhe

achchha hua ki bhul gae mehrban mujhe

manus ho gaya hun kuchh aisa qafas se main

aata nahin hai yaad abhi aashiyan mujhe

taqat nahin ki zabt karun raaz-e-gham magar

KHamosh kar rahi hai ye meri zaban mujhe

han phir tu jalwa-bar ho ai barq-e-tur-soz

han han abhi hai hausla-e-imtihan mujhe

mar kar bhi kashmakash hai wahi husn-o-ishq ki

dena paDe na hashr mein bhi imtihan mujhe

mere liye muraqqa-e-ibrat hai kaenat

ek dars de rahi hai bahaar-e-KHizan mujhe

jab taqaton ne meri mujhe de diya jawab

phir kya pukarta jaras-e-karwan mujhe

'saqib' kisi se apni tabahi ka kya gila

KHud sai-e-justuju ne kiya be-nishan mujhe