main abhi ek bund hun pahle karo dariya mujhe

maiñ abhī ik buuñd huuñ pahle karo dariyā mujhe

phir agar chāho karo vābasta-e-sahrā mujhe

phailtā hī jā rahā thā maiñ ḳhamoshī kī tarah

qulzum-e-āvāz ne har samt se gherā mujhe

mere hone yā na hone se use matlab na thā

tere hone kā tamāshā hī lagī duniyā mujhe

log kahte haiñ kisī manzar kā maiñ bhī rañg thā

tū ne ai chashm-e-falak uḌte hue dekhā mujhe

āshnā us paar ke manzar nahīñ mujh se magar

jāntā hai dhund kī dīvār kā saayā mujhe

maiñ ki sannāToñ kā mub.ham isti.āra thā koī

dāstāñ hotā zamānā shauq se suntā mujhe

shukr hai maiñ ik sadā thā tā.ir-e-ma.anī na thā

varna vo to zer-e-dām-e-harf hī rakhtā mujhe

maiñ hī maiñ huuñ aur badan ke ġhaar meñ koī nahīñ

kar diyā tanhā sagān-e-dahr ne kitnā mujhe

main abhi ek bund hun pahle karo dariya mujhe

phir agar chaho karo wabasta-e-sahra mujhe

phailta hi ja raha tha main KHamoshi ki tarah

qulzum-e-awaz ne har samt se ghera mujhe

mere hone ya na hone se use matlab na tha

tere hone ka tamasha hi lagi duniya mujhe

log kahte hain kisi manzar ka main bhi rang tha

tu ne ai chashm-e-falak uDte hue dekha mujhe

aashna us par ke manzar nahin mujh se magar

jaanta hai dhund ki diwar ka saya mujhe

main ki sannaTon ka mubham istiara tha koi

dastan hota zamana shauq se sunta mujhe

shukr hai main ek sada tha tair-e-mani na tha

warna wo to zer-e-dam-e-harf hi rakhta mujhe

main hi main hun aur badan ke ghaar mein koi nahin

kar diya tanha sagan-e-dahr ne kitna mujhe