main agar naqsh banaun wo miTa sakta hai

maiñ agar naqsh banā.ūñ vo miTā saktā hai

ishq āñdhī hai ghane peḌ girā saktā hai

ḳhvāb kyā hai ye dahaktā huā angāra hai

chashm-e-barfāb meñ bhī aag lagā saktā hai

sirf āñkheñ hī nahīñ saarā badan ḳhasta hai

dekh ye hijr kisī samt se aa saktā hai

mere siine pe lage zaḳhm gavāhī denā

phuul khil jaa.e to māhaul sajā saktā hai

vaqt marham hai ye hañstā hai hañsātā hai miyāñ

ye to taqdīr ke mātam ko bhulā saktā hai

kyā ḳhabar kaun hai suufī hai qalandar hai ki ġhaus

mere andar hī to hai mujh ko bulā saktā hai

kitnā tanhā.ī kā sannāTā hai chāroñ jānib

saañs lene se bhī ik shor sā aa saktā hai

ḳhud se bichhḌā to tire dar pe chalā aaya huuñ

ek tū hai jo mujhe mujh se milā saktā hai

maiñ mohabbat huuñ azal aur abad mujh meñ haiñ

mujh sivā kaun 'safī' mujh ko samā saktā hai

main agar naqsh banaun wo miTa sakta hai

ishq aandhi hai ghane peD gira sakta hai

KHwab kya hai ye dahakta hua angara hai

chashm-e-barfab mein bhi aag laga sakta hai

sirf aankhen hi nahin sara badan KHasta hai

dekh ye hijr kisi samt se aa sakta hai

mere sine pe lage zaKHm gawahi dena

phul khil jae to mahaul saja sakta hai

waqt marham hai ye hansta hai hansata hai miyan

ye to taqdir ke matam ko bhula sakta hai

kya KHabar kaun hai sufi hai qalandar hai ki ghaus

mere andar hi to hai mujh ko bula sakta hai

kitna tanhai ka sannaTa hai chaaron jaanib

sans lene se bhi ek shor sa aa sakta hai

KHud se bichhDa to tere dar pe chala aaya hun

ek tu hai jo mujhe mujh se mila sakta hai

main mohabbat hun azal aur abad mujh mein hain

mujh siwa kaun 'safi' mujh ko sama sakta hai