main apne aqab mein hun gali hai mere pichhe

maiñ apne 'aqab meñ huuñ galī hai mire pīchhe

ik guzrī huī shaam khaḌī hai mire pīchhe

kab thak ke girūñ aur mire uupar se guzar jaa.e

ik rāhguzar kab se paḌī hai mire pīchhe

vo din bhī 'abas lauT ke aayā mirī ḳhātir

ye shab bhī yūñhī ḳhaar huī hai mire pīchhe

ik baar palaT kar nahīñ dekhī thiiñ vo āñkheñ

har vaqt ye lagtā hai koī hai mire pīchhe

maiñ dasht-e-balā hī sahī sāhil thā kisī kā

ik naav kahīñ Duub ga.ī hai mire pīchhe

kānoñ meñ yūñhī uñgliyāñ Thūñse rahūñ kab tak

rah bhūlī huī koī hañsī hai mire pīchhe

main apne 'aqab mein hun gali hai mere pichhe

ek guzri hui sham khaDi hai mere pichhe

kab thak ke girun aur mere upar se guzar jae

ek rahguzar kab se paDi hai mere pichhe

wo din bhi 'abas lauT ke aaya meri KHatir

ye shab bhi yunhi KHar hui hai mere pichhe

ek bar palaT kar nahin dekhi thin wo aankhen

har waqt ye lagta hai koi hai mere pichhe

main dasht-e-bala hi sahi sahil tha kisi ka

ek naw kahin Dub gai hai mere pichhe

kanon mein yunhi ungliyan Thunse rahun kab tak

rah bhuli hui koi hansi hai mere pichhe