main apne ashk mein KHud ko bhigo raha hun abhi

maiñ apne ashk meñ ḳhud ko bhigo rahā huuñ abhī

ḳhatā ko ashk-e-nadāmat se dho rahā huuñ abhī

mujhe na chāhiye takiya kisī bhī takiye kā

maiñ maañ ke haath pe sar rakh ke so rahā huuñ abhī

mire mizāj se nafrat rahī hai sūraj ko

maiñ ham-kalām jo jugnū se ho rahā huuñ abhī

kisī bhī haal meñ saudā zamīr kā na karo

maiñ arz-e-nau meñ yahī biij bo rahā huuñ abhī

nikal paḌā huuñ maiñ ḳhud ko talāsh karne ko

maiñ apne aap meñ ḳhud ko hī kho rahā huuñ abhī

mile jo baar qazā ke to meñ uThā bhī sakūñ

tabhī hayāt ke har bojh Dho rahā huuñ abhī

maiñ bārishoñ meñ kabhī dhuup kī harārat meñ

gharauñdā ġhaur se dekhā to ro rahā huuñ abhī

main apne ashk mein KHud ko bhigo raha hun abhi

KHata ko ashk-e-nadamat se dho raha hun abhi

mujhe na chahiye takiya kisi bhi takiye ka

main man ke hath pe sar rakh ke so raha hun abhi

mere mizaj se nafrat rahi hai suraj ko

main ham-kalam jo jugnu se ho raha hun abhi

kisi bhi haal mein sauda zamir ka na karo

main arz-e-nau mein yahi bij bo raha hun abhi

nikal paDa hun main KHud ko talash karne ko

main apne aap mein KHud ko hi kho raha hun abhi

mile jo bar qaza ke to mein uTha bhi sakun

tabhi hayat ke har bojh Dho raha hun abhi

main barishon mein kabhi dhup ki hararat mein

gharaunda ghaur se dekha to ro raha hun abhi