main apne ghar mein hi apni farawani se rahta hun

maiñ apne ghar meñ hī apnī farāvānī se rahtā huuñ

bahut uktāyā uktāyā jahāñbānī se rahtā huuñ

ye saarī 'aurateñ ye baaġh ye dariyā ye maiḳhāne

kahīñ rahtā bhī huuñ to apnī hairānī se rahtā huuñ

bahut hangāma-ḳhezī pahlī pahlī sā'atoñ meñ thī

magar ab ḳhalvat-e-mushkil meñ āsānī se rahtā huuñ

musalsal ek amboh-e-ziyāñ ke darmiyāñ bekār

maiñ apne aap meñ kitnī pareshānī se rahtā huuñ

farāvānī baham rakhtī hai ye āsūdgī mujh meñ

kisī ke dhyān meñ maiñ apnī be-dhyānī se rahtā huuñ

garebāñ chaak honā shart thī so khul gayā mujh par

ki maiñ kyoñ ḳhush tire phūloñ kī 'uryānī se rahtā huuñ

main apne ghar mein hi apni farawani se rahta hun

bahut uktaya uktaya jahanbani se rahta hun

ye sari 'auraten ye bagh ye dariya ye maiKHane

kahin rahta bhi hun to apni hairani se rahta hun

bahut hangama-KHezi pahli pahli sa'aton mein thi

magar ab KHalwat-e-mushkil mein aasani se rahta hun

musalsal ek amboh-e-ziyan ke darmiyan bekar

main apne aap mein kitni pareshani se rahta hun

farawani baham rakhti hai ye aasudgi mujh mein

kisi ke dhyan mein main apni be-dhyani se rahta hun

gareban chaak hona shart thi so khul gaya mujh par

ki main kyon KHush tere phulon ki 'uryani se rahta hun