main apne hisse ki tanhai mahfil se nikalunga

maiñ apne hisse kī tanhā.ī mahfil se nikālūñgā

jo lā-hāsil zarūrī hai to hāsil se nikālūñgā

mire ḳhuuñ se ziyāda tū mirī miTTī meñ shāmil hai

tujhe dil se nikālūñgā to kis dil se nikālūñgā

mujhe mā'lūm hai ik chor darvāza aqab meñ hai

magar is baar maiñ rasta muqābil se nikālūñgā

shabīhoñ kī tarah qabreñ mujhe āvāz detī haiñ

maiñ aks-e-raftgāñ ā.īna-e-gul se nikālūñgā

hujum-e-sahl-añgārāñ mire hamrāh chaltā hai

maiñ jaise rāh-e-āsāñ rāh-e-mushkil se nikālūñgā

bharam sab khol ke rakh dūñgā masnū'ī mohabbat ke

koī taaza fasāna dasht-o-mahmil se nikālūñgā

tumheñ ab tairnā ḳhud siikh lenā chāhiye 'shāhid'

tumheñ kab tak maiñ girdāb-e-masā.il se nikālūñgā

main apne hisse ki tanhai mahfil se nikalunga

jo la-hasil zaruri hai to hasil se nikalunga

mere KHun se ziyaada tu meri miTTi mein shamil hai

tujhe dil se nikalunga to kis dil se nikalunga

mujhe ma'lum hai ek chor darwaza aqab mein hai

magar is bar main rasta muqabil se nikalunga

shabihon ki tarah qabren mujhe aawaz deti hain

main aks-e-raftgan aaina-e-gul se nikalunga

hujum-e-sahl-angaran mere hamrah chalta hai

main jaise rah-e-asan rah-e-mushkil se nikalunga

bharam sab khol ke rakh dunga masnu'i mohabbat ke

koi taza fasana dasht-o-mahmil se nikalunga

tumhein ab tairna KHud sikh lena chahiye 'shahid'

tumhein kab tak main girdab-e-masail se nikalunga