main apne ishq mein paiham zawal dekhta hun

maiñ apne ishq meñ paiham zavāl dekhtā huuñ

jo tere chāhne vāloñ kā haal dekhtā huuñ

maiñ is liye bhī nahīñ dekhtā huuñ ā.īna

vahāñ jo chehra hai us par jalāl dekhtā huuñ

badal ga.ī hai samā.at mirī basārat se

maiñ ḳhvāb suntā huuñ lekin ḳhayāl dekhtā huuñ

kahā hai tū ne ki terī misāl koī nahīñ

magar maiñ nuur meñ terī misāl dekhtā huuñ

maiñ chāhtā huuñ ki ḳhud ḳhaak par utar aa.uuñ

jab āsmāñ se zamīñ kā jamāl dekhtā huuñ

hazār vasvase dil meñ ubharne lagte haiñ jab

kisī ġharīb ke shāne pe shawl dekhtā huuñ

maiñ hoñT dekhtā huuñ phuul dekhne ke baad

to tere dast-e-hunar kā kamāl dekhtā huuñ

phir us ke baad koī baat kar nahīñ paatā

jab us faqīr kī āñkhoñ ko laal dekhtā huuñ

ba-sad-ḳhulūs nasīhat ko suntā rahtā huuñ

phir apne haath se maiñ apnā gaal dekhtā huuñ

jo dard sahte haiñ lekin ḳhamosh rahte haiñ

ab aise log baḌe ḳhāl-ḳhāl dekhtā huuñ

main apne ishq mein paiham zawal dekhta hun

jo tere chahne walon ka haal dekhta hun

main is liye bhi nahin dekhta hun aaina

wahan jo chehra hai us par jalal dekhta hun

badal gai hai samaat meri basarat se

main KHwab sunta hun lekin KHayal dekhta hun

kaha hai tu ne ki teri misal koi nahin

magar main nur mein teri misal dekhta hun

main chahta hun ki KHud KHak par utar aaun

jab aasman se zamin ka jamal dekhta hun

hazar waswase dil mein ubharne lagte hain jab

kisi gharib ke shane pe shawl dekhta hun

main honT dekhta hun phul dekhne ke baad

to tere dast-e-hunar ka kamal dekhta hun

phir us ke baad koi baat kar nahin pata

jab us faqir ki aankhon ko lal dekhta hun

ba-sad-KHulus nasihat ko sunta rahta hun

phir apne hath se main apna gal dekhta hun

jo dard sahte hain lekin KHamosh rahte hain

ab aise log baDe KHal-KHal dekhta hun